सछिदँ बुन्हिं यानाः झन लिमलाः !
यल – मेपिं जूसा ला सछिदँय् क्यन कि लासाय् ग्वारातुलाः आराम हे कयाच्वनीगु जुइ । तर शताब्दी पुरुष सत्यमोहन जोशीया खँ धाःसा मेगु हे दु । थ्वहे वइगु सोमवाः यल महानगरपालिकां वय्कःया सछिदँ बुन्हि तःजिक हनेगु तयारी यानाच्वंगु दु । थुकिं यानाः जोशीया दिनचर्या तकं प्रभावित जू वंगु दु ।
सछिदँ तयारीया लागिं ज्या सना–च्वंपिं मनूत सुथंनिसे हे छेँय् वइगुलिं वय्कःया लि हे मलाः । न्हिं स्वीम्ह निसें पीम्ह तक मनू छेँय् थ्यनी । उकी मध्ये गुलिं सपूm प्रकाशन बारे खँ ल्हाः वइपिं, गुलिं नाटकया तयारी बारे सा गुलिं म्येया तयारी बारे जानकारी बिउ वउपिं खः । थौं पत्रकारतय् छगू पुचः नं वय्कःयात नापलाः वनेत्यंगु दु ।
यल मनपाया मेयर चिरिबाबु महर्जन नं इलय् ब्यलय् थ्यनाच्वनी । बुन्हिया तयारी कथं महानगरं वय्कःया छेँय् यचुपिचु यानाच्वंगु दु । सोमवाः वय्कःयात सार्वजनिक रुपं अभिनन्दन यानाः हनीगु ज्याझ्वः दुसा वकुन्हु राष्ट्रपति विद्याभण्डारी मूपाहां कथं झाइगु निश्चित जूगु दु ।
वकुन्हु राष्ट्रपति भण्डारी वय्कःया छेँय् समेत झाइगु ज्याझ्वः दुगुलिं नं यचुपिचुइ बः बियाच्वंगु सीदु । सोमवाः गते कथं वय्कःया बुन्हि खःसां तिथि कथंया बुन्हि धाःसा १५ न्हु लिपाया नवमि कुन्हु लाः ।
LEAVE YOUR COMMENTS