सरकारं सामुदायिक विद्यालययात संरक्षण बीमाः

येँ – सरकारं शिक्षा क्षेत्रय् लगानी अप्वयेकाः उचित संरक्षण यायेमाःगु खँय् सरोकारवालातय् बः बिउगु दु । सामुदायिक ब्वनेकुथियात माखां खाचा त्वपूथें ज्याःगु संरक्षण बीमाःगु शिक्षाविद् डा. केदारभक्त माथेमां धयादिल । शिक्षा पत्रकार समूहया १९ क्वःगु वार्षिकोत्सवया लसताय् जूगु ज्याझ्वलय् वय्कलं उगु खँ धयादीगु खः ।

त्रिभुवन विश्वविद्यालयाय पुलांम्ह उपकुलपति माथेमां सामुदायिक ब्वनेकुथिया शिक्षाया गुणस्तर थकायेत सरकारं शिक्षा क्षेत्रय् लगानी अप्वयेकाः माखां खाचा त्वपुना तःथें संरक्षण बिया वनेमाःगु खँय् बः बियादीगु खः । वय्कलं सामुदायिक ब्वनेकुथिया शिक्षाया गुणस्तर कुहां वनाच्वंगु व गणित, विज्ञान व अंग्रेजी थेंज्याःगु विषयय् उपलब्धि म्हो जूगुया लिउने सरकारं थुकियात प्राथमिकताय् मतःगुलिं खः धयादिल ।

‘खय्त ला सरकारयाके गुलि स्रोत दयेमाःगु खः, उलि मदु, अय्नं सरकारं शिक्षाया मौलिक हक कार्यान्वयनया निंतिं सामुदायिक ब्वनेकुथियात पूर्णरुपं हे संरक्षण बीगु स्वयेमाः’ माथेमां धयादिल । शिक्षाा मन्त्रालयया सचिव खगराज बरालं विद्यार्थीतय्त छगू हे ढाँचां ब्वंकेगु, स्यनेगु यायेगु मखसे थीथीकथंया प्रविधिया माध्यमं नं ब्वंकेगु, स्यनेगु याना यंकल धाःसा उकिं शैक्षिक क्षेत्रय् तःधंगु हिउपाः हये फइ धयादिल ।

लिसें वय्कलं सरकार निःशुल्क शिक्षा कार्यान्वयन यायेगपाखे लगे जुयाच्वंगु व उकिया निंतिं वैकल्पिक श्रोत मालेगुलिइ लगे जुयाच्वंगु दु धयादिल । ज्याझ्वलय् त्रिवि पत्रकारिता व आमसंचार विभागया प्रमुख प्रा. चिरञ्जीवी खनालं समाज रुपान्तरण यायेगु खःसा विधागत पत्रकारिता खोजमूलक रिपोर्टिंगय् वनेमाः धयादिल ।

शिक्षाविद् डा. सुशन आचार्य, संस्थाया नायः रोश्ना सुब्बा व पुलांम्ह नायः प्रकाश सिलवालं नं नवानादीगु ज्याझ्वलय् बालमैत्री वातावरणपाखें ब्वनेकुथिया सुधारया नेतृत्व याःगु पंचकन्या आधारभूत विद्यालय (येँ)या प्रधानाध्यापक विनिता रंजित व जनता आधारभूत विद्यालय (सिरहा)या प्रधानाध्यापक देवकुमार महतोयात सम्मान नं याःगु खः ।