प्रमयात नं अदालत वयेत आदेश

येँ (नेपालभाषा टाइम्स)सर्वोच्च अदालतं अदालतया अवहेलना याःगु मुद्दाय् प्रधानमन्त्री केपी शर्मा ओलीयात लिखित लिसः ज्वनाः थःहे अदालतय् उपस्थित जुइत आदेश बिउगु दु । प्रतिनिधिसभा विघटनया मुद्दाय् ‘बाजे वकिलयात इजलासय् यंकाः तमासा याःगु’ धकाः प्रम ओलीं न्ववाःगुलिं ओली विरुद्ध अदालतया अवहेलनाया मुद्दा लाःगु खः ।

रिटया प्रारम्भिक सुनुवाइ यासें न्यायाधीश मनोजकुमार शर्माया एकल इजलासं अवहेलनाय् छाय् कारबाही यायेम्वाःगु खः धइगु बारे लिखित लिसः लिसें थःहे उपस्थित जुइगु आदेश बिउगु खः ।

अदालतया आदेश कथं प्रधान–मन्त्री केपी शर्मा ओलीं आः थः हे अदालतय् वनाः लिसः बीमाःगु अवस्था ब्वलंगु दु । उकथं हे अदालतया अवहेलना सम्बन्धी सर्वोच्च अदालतं प्यम्ह पुलांपिं न्यायाधीश व पुलांम्ह सभामुख दमननाथ ढुंगानायात नं लिखित लिसः बीत माग याःगु दु । म्हिगः न्यायाधीश मनोजकुमार शर्माया एकल इजलासं पुलांपिं प्रधानन्यायाधीशपिं मीनबहादुररायमाझी, अनुपराज शर्मा, कल्याण
श्रेष्ठ व सुशीला कार्की लिसें पुलांम्ह सभामुख ढुंगानायात न्हय्न्हुया दुने लिखित लिसः बीत निर्देशन बिउगु खः ।

पुलांपिं न्यायाधीशपिं विरुद्ध अधिवक्ता धनजीत बस्नेत व लोचन भट्टराईं बिस्कं बिस्कं अवहेलनाया मुद्दा दर्ता याःगु खः । उकथं हे पुलांम्ह सभामुख ढुंगाना विरुद्ध अधिवक्ता राजाराम घिमिरें मुद्दा दर्ता याःगु खः ।

प्यम्ह पुलांपिं प्रधानन्यायाधीशपिंसं संसद विघटन असंवैधानिक धासें मंकाः विज्ञप्ति जारी याःगु खः । उकथं हे पुलांम्ह सभामुख ढुंगानां ‘सतकं न्यायाधीश साले मालीगु अवस्था मवयेमा’ धकाः टिप्पणी यानादीगु दु ।

पुलांपिं प्रधानन्यायाधीश व पुलांम्ह सभामुखया टिप्पणीं अदालतय् विचाराधीन संसद विघटनसम्बन्धी मुद्दा प्रभावित यायेत स्वःगु निवेदकया जिकीर खः ।

सम्बन्धित बुखँ

LEAVE YOUR COMMENTS