रास्वपा हाकनं सरकारय् वनीगु
येँ (नेपालभाषा टाइम्स)÷ राष्ट्रिय स्वतन्त्र पार्टीयात हाकनं सरकारय् हयेगु तयारी जुयाच्वंगु सीदुगु दु । सर्वोच्च अदालतं रास्वपाया सभापति रवि लामिछानेया नागरिकता अवैध जूगु ठहर यायेवं रास्वपापाखें गृहमन्त्री जुयाच्वंम्ह रवि लामिछानेया सांसद पद खारेज जूगु खः ।
सांसद पद खारेज जूसां गैरसांसदयात नं खुला तक मन्त्री दयेकेगु जिउगु प्रावधान कथं थःत हे गृहमन्त्री दयेकेमाः धकाः यानाच्वंगु मागयात प्रधानमन्त्री पुष्पकमल दाहालं संवोधन मयायेवं रास्वपाया मेमेपिं मन्त्रीतय्सं नं राजीनामा बियाः सरकारं पिहां वःगु खः । तर आः हाकनं लामिछानें थः मखुसां मेपिंत मन्त्री दयेकाः सरकारय् ब्वति कायेगु तयारी यानाच्वंगु खँ सीदुगु दु । थुकिया निंतिं लामिछाने आः हाकनं थःगु पार्टी दुने व गठबन्धन दुने सहलह ब्याकाहःगु खँ सीदुगु दु ।
सभापति लामिछाने सरकारय् वनेगु नितिं एमालेया अध्यक्ष केपी शर्मा ओली व प्रम दाहाललिसे खँल्हाबल्हा यायेधुंकूगु दु ।
सूत्रया कथं म्हिगः च्वंगु उच्चस्तरीय राजनीतिक संयन्त्रया बैठकय् एमाले अध्यक्ष केपी शर्मा ओली रास्वपायात सरकार हयेगु प्रस्ताव यानादीगु खः । सूत्रया कथं आः प्वनाच्वंगु मन्त्रालयय् रास्वपाया लिसें मेमेगु दलतय्त हयेगु नितिं अध्यक्ष ओली प्रस्ताव यानादीगु खः ।
ओलीया प्रस्तावयात कयाः प्रम दाहालं गुगुं नं कथंया प्रतिक्रिया धाःसा बियामदीगु खँ स्रोतं धाःगु दु । म्हिगःया बैठकय् ओलीं राष्ट्रपतिया निर्वाचन न्ह्यः हे मन्त्रिपरिषद विस्तार यायेमाःगु प्रस्ताव नं तयादीगु खः । रास्वपां सरकारं पिहां वःसां सरकारयात बियातःगु समर्थन धाःसा लित काःगु मदुनि ।
वंगु माघ २४ गते मन्त्रिपरिषदया बैठकया निर्णय बारे जानकारी बीत ग्वसाः ग्वःगु पत्रकार सम्मेलनय् सरकारया प्रवक्ता लिसे सञ्चार तथा प्रविधि मन्त्री रेखा शर्मां नं रास्वपायात हाकनं सरकारय् हयेगु कुतः जुयाच्वंगु जानकारी बियादीगु खः ।
रास्वपाया सांसद मनिष झां म्हिगः च्वंगु उच्चस्तरीय राजनीतिक संयन्त्रया बैठकय् थःगु पार्टीयात सरकारय् हयेगु बारे चर्चा जूगु खँ थःत जानकारी दुगु खँ धयादीगु दु । तर पार्टीं धाःसा सरकारय् वनेगु वा मवनेगु धइगु बारे निर्णय धाःसा मयानिगु खँ नं वय्कलं धयादीगु दु ।
थ्वहे झ्वलय् माओवादी केन्द्रया नेता देवेन्द्र पौडेलं नं रास्वपायात सरकारय् हयेगु बारे सहलह जुयाच्वंगु खँ धयादीगु दु । वय्कलं रास्वपायात थःपिसं सरकार त्वःता हुँ मधयागु, उपिं थः हे पिहां वंगुलिं यानाः यदि सरकारय् वये चाहे जुल धाःसा सरकारय् हयेफइगु खँ धयादीगु दु ।
नेता पौडेलं नं राष्ट्रपतिया चुनाव न्ह्यः हे सरकारयात पूर्णता बीगु कथं सहलह जुयाच्वंगु धासें रास्वपायात जक मखुसे सरकारय् ब्वति कायेकेगु नितिं मेगु राजनीतिक पार्टीलिसे नं सहलह जुयाच्वंगु जानकारी बियादीगु खः ।
LEAVE YOUR COMMENTS