अपराध नियन्त्रणया निंतिं सहकार्य याइगु

येँ – येँया प्रमुख पर्यटकीय लागामध्ये छगू थँबहिलिइ जुइगु अपराध नियन्त्रणया निंतिं सहकार्य याइगु जूगु दु । नेपाः चाःहिउ वइपिं विदेशी पर्यटकया निंतिं मुख्य आकर्षणया केन्द्रया रुपय् दयाच्वंगु थँबहिलिइ जुइगु अपराध व आपराधिक गतिविधि नियन्त्रणया निंतिं सुरक्षाकर्मि व स्थानीय दथुइ सहकार्यया यायेमाःगु आवश्यकता महसुस याःगु खः ।

महानगरीय प्रहरी वृत्त लैनचौरं वंगु छुं दिं न्ह्यः ग्वसाः ग्वःगु नागरिक सुनुवाई ज्याझ्वलय् सहभागि वक्तातय्सं सुरक्षाया निंतिं खटे जुइपिंसं जक अपराध नियन्त्रण याये फइमखु धासें उकिया निंतिं स्थानीयतय्सं नं ग्वाहालि यायेमाःगु आवश्यक जूगु खँय् बः बिउगु खः ।

ज्याझ्वलय् येँ महानगरीय प्रहरी परिसरया प्रमुख वरिष्ठ प्रहरी उपरीक्षणक विश्वराज पोखरेलं प्रमुख पर्यटकीय लागा थँबही नापं स्वनिगःया हे शान्ति सुरक्षा व्यवस्थाया निंतिं प्रहरीं इमान्दराीतापूर्वक थःगु ज्या याना वयाच्वंगु दु धयादिल ।

अथे हे ज्याझ्वलय् येँ महानगरपालिका वडा नं. १६ या वडाअध्यक्ष मुकुन्द रिजालं थँबहीया शान्ति सुरक्षाय् प्रहरीं गुकथं ज्या यायेमाःगु खः, उकथं ज्या याये फयाच्वंगु मदु धासें थँबही चाःहिउ वइपिं विदेशी पर्यटकतय्त सहज रुपं थँबही चाःहिलेगु वातावरण दयेकेत प्रहरी, स्थानीयवासी व जनप्रतिनिधि मिले जुयाः न्ह्याः वनेमाः धयादिल ।

येँ महानगरपालिका १७ वडाया वडाअध्यक्ष नवीन मानन्धरं शान्ति सुरक्षाया व्यवस्था बांलाके फत धाःसा थ्व समृद्धिया नं छगू आधार जुइ धासें समृद्धिया लँय् वनेगु खःसा शान्ति सुरक्षायात नं बल्लाकाः यंकेगु स्वयेमाः धयादिल ।

लैनचौर प्रहरी वृत्तया प्रमुख प्रहरी नायब उपरीक्षक गौतमकुमार केसीं स्थानीय जनसमुदायपाखें प्राप्त सल्लाह व सुझावया लिधंसाय् थःपिं न्ह्याः वनेगु जुइ धासें शान्ति सुरक्षा व्यवस्था कायम यानातयेत थःपिंसं फक्व कुतः यानाच्वनागु धयादिल ।