नाय्खिं बाजं प्रशिक्षार्थीतय्त प्रमाण पत्र लःल्हात

येँ – नेपाल राष्ट्रिय खड्गी समाज, येँ महानगरपालिका १९ वडा कचाया ग्वसालय् जूगु नाय्खिं बाजं प्रशिक्षण ज्याझ्वः क्वचाल । समाजया १९ वडा कचा नायः अजय शाहीया सभापतित्वय् जूगु ज्याझ्वलय् मूपाहां कथं येँ क्षेत्र नं ८ या प्रतिनिधिसभा सदस्य जीवनराम श्रेष्ठ झायादीगु खः । ज्याझ्वलय् नवासें मूपाहां श्रेष्ठं आः येँया स्थानीयवासीत राजनीतिक तहय् सक्रिय जुया वयेमाःगु खँय् खँ बियादिल ।

लिसें वय्कलं स्वनिगलय् च्वंपिं नेवाःत सांस्कृतिक व सामाजिक क्षेत्रय् जक मखसे आः राजनीतिक क्षेत्रय् नं सशक्त रुपं न्ह्याः वनेमाः धयादिल । नीति निर्माण यायेगु ज्याय् थन च्वंपिं नेवाःतय् उपस्थिति प्रभावकारी जुइ मफुगुलिं हे स्थानीय संस्कृतिया संरक्षण नं प्रभावकारी रुपं जुइ मफयाच्वंगु वय्कःया धापू दु ।

ज्याझ्वलय् वय्कलं समाजया १९ कचापाखें वंगु भदौ १६ गतेनिसें न्ह्याःगु नाय्खिं बाजंया प्रशिक्षार्थीतय्त दसिपौ लःल्हानादीगु खःसा बाजं प्रशिक्षक गुरुपिंत सम्मान नं यानादीगु खः । ज्याझ्वलय् बाजं गुरुपिंत समाजया केन्द्रीय नायः मानबहादुर खड्गीं दोसल्लां न्ययेकादीगु खःसा मूपाहां श्रेष्ठं हनापौलःल्हानादीगु खः ।

समाजया केन्द्रीय महासचिव नन्दकिशोर शाहीं थौंया ल्याय्म्ह पुस्तां परम्परागत संस्कति त्वःता वनाः पाश्चात्य संस्कृतिपाखे आकर्षित जुया वनाच्वंगु खँय् दुःख प्वंकादिसें थौंया इलय् ल्याय्म्हतय् निंतिं थुकथंया परम्परागत सांस्कृतिक बाजंया प्रशिक्षणत बिया वनाच्वनेमाःगु खँय् बः बियादिल ।

ज्याझ्वलय् प्रदेश नं. ३या प्रदेशसभा सदस्य राजेश शाक्य, हनुमाध्वाखा दरवार संरक्षण कार्यक्रमया प्रमुख उदय पसःखलः, समाजया केन्द्रीय सचिवपिं श्यामकृष्ण शाही, मिलन शाही, बाजं प्रशिक्षक विजय शाही लगायतपिनिगु उपस्थिति दुगु खः ।कचाया न्वकु सुजित शाहीं लसकुस यानादीगु ज्याझ्वलय् रत्नलाल शाही, दिलकुमारी शाही, विष्णुबहादुर शाही व हेराबहादुर शाहीपिंत नं सम्मान याःगु खः ।

अथे हे बाजं प्रशिक्षक शाहीलिसें मेम्ह प्रशिक्षक अनुप शाही, सहायक प्रशिक्षकपिं रिकेश शाही, दिलकृष्ण शाही, रोजन शाहीयात कदर पत्र लःल्हाःगु खः । नाय्खिं बाजंया प्रशिक्षण काःपिंसं बाजं थाना क्यंगु ज्याझ्वलय् गोविन्द ह्यूमत, माणिक शाही, सुरेश मानन्धर, अन्जन श्रेष्ठं म्येँ न्यंकादीगु खःसा इन्द्र विनायक क्लबपाखें हुलाप्याखं न्ह्यब्वःगु खः ।