भूमि आयोग व सुकुम्वासी विषयय् अन्तक्र्रिया

येँ(नेपालभाषा टाइम्स)- नेपाः युथ अर्गनाइजेसनया ग्वसालय् ‘भूमि आयोग व झीगु सरोकार’ विषयय् अन्तक्र्रिया ज्याझ्वः जुल । अर्गनाइजेसनं भूमि आयोग, सुकुम्वासीया अवस्था, व्यवस्थापनया विषयय् केन्द्रीत जुयाः उगु अन्तक्र्रिया याःगु खः ।

ज्याझ्वलय् राष्ट्रिय भूमि आयोग येँया अध्यक्ष श्यामकृष्ण प्रजापतिं राज्यं छक्वःया निंतिं भूमिहीनयात भूमिपति दयेकेगु कुतः यानाच्वंगु दु धासें थुगु ज्याय् सकसिनं थःथःगु थासं ग्वाहालि यायेत इनाप यानादिल । लिसें वय्कलं वास्तविक सुकुम्वासीया पहिचान यायेत नं इनाप यानादिल ।

परिस्थितिं भूमिहीन जुयाच्वंपिं वास्तविक सुकुम्वासीया म्हसीकेगु प्रक्रिया न्ह्यःने यंकेत येँया दक्वं स्थानीय तहयात इनाप यानादिसें वय्कलं धयादिल, ‘भूमिहीन दलित, सुकुम्वासी, अव्यवस्थित बसोबासीया लगत संकलन, छानविनलिसें जग्गा प्राप्तिया निंतिं सिफारिस यायेगु अधिकार स्थानीय तहयात दु । उकिं डोजर ज्वनाः वनेगु स्वयां प्रक्रिया पूवंकाः वास्तविक सुकुम्वासीया पहिचान यायेगु ज्याय् ग्वाहालि यायेत दक्व स्थानीय तहयात जिं इनाप यानाच्वना ।

विकासया नामय् स्वनिगःया स्थानीयतय्त सुकुम्वासी जुइत राज्यं बाध्य यानाच्वंगु धासें छक्वःया निंतिं मौकाया सदुपयोग यायेत नं वय्कलं इनाप यानादिल ।

नेवाः देय् दबूया नायः पवित्र वज्राचार्यं स्वनिगलय् सतक विस्तारलिसें मेमेगु कथित विकासया नामय् जुयाच्वंगु योजनां थनया स्वबासी नेवाः समुदाय सुकुम्वासी जुइ मालाच्वंगु दु धासें पीडिततनाप समन्वय यानाः आयोगलिसे सहकार्य यायेत देय् दबू तयार दु धयादिल ।

अर्गनाइजेसनया विजय डंगोलं राज्यं कथित विकासया नामय् स्वनिगःवासीयात सुकुम्वासी यायेगु ज्या यानाच्वंगु व आः येँया स्थानीयवासीयात भूमिपति दयेकेत अर्गनाइजेसन सक्रिय रुपं लगे जुइगु जुइ धयादिल ।

ज्याझ्वलय् थीथी जातीय संघसंस्था, सामाजिक संस्थालिसें थीथी अभियानया अभियन्तानापं भूमिहीन स्वबासीतय् उपस्थिति दुगु खः ।