नेपाःया बुद्धधर्म ख्यलय् विशिष्ट योगदान दुम्ह श्रीलंकाया भिक्षु कोटुगोड धम्मावास महास्थविर मंत

येँ – श्रीलंकाया बौद्धधर्मया प्रचलित स्वंगू प्रमुख निकाय मध्ये छगू अमरापुर महानिकायया प्रमुख महानायक भिक्षु कोटुगोड धम्मावास महानायक महास्थविर थौं सोमवाः ८८ दँया वैंशय् मन्त । वसपोल नेपाः लिसे तसकं सतिक स्वापू दुम्ह, नेपालय् बुद्ध धर्म न्यंकेगु निंतिं विशिष्ट योगदान दुम्ह भन्ते खः । स्वयम्भुस्थित आनन्दकुटी विहारं भगवान बुद्धया अस्थिधातु खुयायंकेधुंकाः वसपोल भन्तेया हे पहलय् श्रीलंकां नेपाःया मेगु अस्थिधातु बिउगु खः । वसपोलं श्रीलंका सरकारया धर्मानुसाशाक मण्डलया दुजः नं खः ।

वसपोल थ्यंमथ्यं बागू दशक न्ह्यवनिसें नेपालय् बुद्ध धर्म व बुद्ध शासन अभिवृद्धि यायेगु निंतिं तःधंगु योगदान यानाबिज्यानाच्वंगु खँ भिक्षु तप्पसीधम्मं कनाबिज्याःगु दु । वसपोल येँया चारुमति विहारया संरक्षक नं खः ।

चारुमति विहारया प्रमुख भिक्षु तप्पसीधम्मं धयाबिज्याःगु दु, ‘वसपोलं हे चारुमति विहार व चारुमति स्तुपााा संरक्षणया निंतिं श्रीलंकां जितः थन छ्वयाबिज्याःगु खः । जि श्रीलंकाय् ब्वनाच्वनागु इलय् वसपोलं चारुमति स्तुपाया इतिहास कनाबिज्यासें थुकिया संरक्षण यानाच्वनेत धयाबिज्याःगु खः । वसपोल चारुमति विहार व स्तुप संरक्षणया अभिभावक खः ।’

सन् १९८१ इ न्हापांखुसी नेपाः बिज्याःम्ह वसपोल भन्तें हे भैरहवाया एयरपोर्ट चोकय् भगवान बुद्धया मूर्ति स्थापना यानाबिज्याःगु खः । वसपोलं येँ, यल, ख्वप, बलम्बु, पोखरा, तानसने, भैरहवा लुम्बिनी बिज्यानाः धर्मदेशना यानाबिज्याःगु दु ।

अथेहे श्रीलंकाय् नेपाःया राजदूतावास मदुनिगु इलय् वसपोलया हे पहलय् श्रीलंकाय् नेपाःपाखें काउन्सिलर जनरल नियुक्त यायेगु ज्या नं जूगु खः । सन् १९८३ इ वसपोलया इनापय् श्रीलंकाय् पर्यटन व्यवसायी कर्ण शाक्ययात काउन्सिलर जनरल नियुक्त याःगु खः ।

सम्बन्धित बुखँ

LEAVE YOUR COMMENTS