च्याम्पियन्स लिग सेमिफाइनल आयाक्सं टोटनह्यामयात बुकल

डच क्लब आयाक्सं च्याम्पियन्स लिग अन्तर्गत जूगु सेमिफाइनलया न्हापागुं लेगय् विजयी चूलाकूगु दु । युवा कासामिं जाःगु आयाक्सं इंग्लिस क्लब टोटनह्यामयात वयागु हे मैदानय् १–० गोलं बुकूगु खः । आयाक्सं कासाया १५ औं मिनेट याःगु छगू हे जक गोल निर्णायक जूगु खः । डोनी भान डे थ्व गोल याःगु खः ।

आयाक्सं उत्कृष्ट कासा म्हितूगु जूसा थप गोल धाःसा यायेमफुत । निगूगु हाफय् आयाक्सया डेविड नेरेसया प्रहार पोष्टय् लानाः लिहां वःगु खः । टोटनह्यामं नं निगूगु हाफय् आक्रामक कासा म्हितूसां गोल यायेमफुत । टोटनह्यामया निम्ह मू कासामि मदुगुया लबः कायेत आयाक्स सफल जूगु खः । टोटनह्यामया मू कासामि ह्यारी केन चोटया कारणं व सन हेउङ मिन प्रतिबन्धय् लाःगु कारणं म्हितेमखंगु खः।

थुगुसी बांलाःगु प्रदर्शन यानाच्वंगु आयाक्सं प्रि–क्वार्टरफाइनलय् डिफेन्डिङ च्याम्पियन्स रियल म्याड्रिड व क्वार्टरफाइनलय् क्रिष्टियानो रोनाल्डोया युभेन्टसयात पराजित याःगु खः । च्याम्पियन्स लिगय् न्हापांखुसी सेमिफाइनलय् थ्यंगु टोटनह्यामं डर्टमनयात प्रि–क्वार्टरफाइनलय् व क्वार्टरफाइनलय् म्यानचेस्टर सिटीयात बुकूगु खः । अवे मैदानय् कासा त्याकूगुलिं आयाक्सयात फाइनल प्रवेश यायेत अःपुइगु खनेदु । निगूगु लेग मे ८ तारिखय् आयाक्सया मैदानय् जुइ ।

सम्बन्धित बुखँ

LEAVE YOUR COMMENTS