राष्ट्रपति लिहां वःबलय् नं सर्गतय् सास्ती

येँ – चीन भ्रमणय् वनेगु झ्वलय् ल्हासा चाःहिउ वंबलय् उसाँय् मदयाः छन्हु न्ह्यः हे लिहां वःम्ह राष्ट्रपति विद्यादेवी भण्डारीया फिर्ती सवारीया कारणं म्हिगः नं नेपाःया सर्गतय् विदेशी विमानतय्सं सास्ती फये माल । म्हिगः सुथय् १० बजे राष्ट्रपति भण्डारीया विमान अवतरण याइगु जुइवं व स्वयां १ घन्टा न्ह्यवंनिसें हे नेपाःया सर्गः खाली यानातःगु खः ।

थुकिं यानाः नेपाःया त्रिभुवन विमानस्थलय् ल्याण्ड यायेत ठिक्क जुयाच्वंगु थीथी देशया विमानत ल्याण्ड याये मफयाः गनं वःगु खः अन हे लिहां वने माःगु खः । चीनया चेन्दुं वःगु एअर चाइनाया विमान घौछि तक सर्गतय् चाःचाःहिलाः नं ल्याण्ड याये मफुसेंलि चेन्दु तुं लिहां वंगु खः । अथे हे कतारया दोहां वःगु हिमालयन एअरया विमानयात नं भारतपाखे ल्याण्ड याके छ्वःगु खः ।

थ्व जहाज नं हेटौंडा व वीरगंजया सर्गःपाखे प्यंगू चक्कर चाःहिलाः नं पाः मवसेंलि भारतय् लिहां वंगु खः । मुम्बईपाखें वःगु इथियोपियन एअरलायन्सया जहाज धाःसा ताः ई तक चक्कर लगे यायेधुंकाः बल्ल ल्याण्ड खंगु खः । उकथं हे राष्ट्रपतिया कारणं मेगु आपालं आन्तरिक उडानत नं प्रभावित जूगु खः ।

थ्व स्वयां न्ह्यः राष्ट्रपति चीन भ्रमणय् वंगु इलय् नं विमानस्थल अवरुद्ध जुयाः करिब २०० गू उडान प्रभावित जूगु खँ पिहां वःगु खः । राष्ट्रपतिया भ्रमणं यानाः ताःई तक यातायात पनाः सर्वसाधारणयात सास्ती बियाच्वंगु बारे ताःई न्ह्यवंनिसें आलोचना जुया वयाच्वंगु खः ।