बजेट फ्वनेत सांसदतय् भिड

अर्थ मन्त्रालयय् बजेट दयेकेगु शुरु

येँ – अर्थ मन्त्रालयं थुगु दँया बजेट दयेकेगु ज्या शुरु यायेवं थःगु चुनाव क्षेत्रय् बजेट तया बी माल धकाः दबाब बीपिं सांसदतय् भिड सिंहदरवारय् शुरु जूगु दु । अथें थ्वहे वइगु जेठ १४ गते बजेट पेश यायेगु तयारी यानाच्वंगु दु । उकिया निंतिं थौंकन्हय् थीथी समिति उपसिमिति दयेकाः बजेटया फ्रेम दयेकाच्वंगु दु ।

थ्वहे खँ सीकाः थःपिनि क्षेत्रय् बजेट तया बीमाल धासें सांसद व थीथी पार्टीया नेतात सिंहदरवारय् भुं वनाच्वंगु खः ।सांसदतय्सं थःथःगु लेटर प्याडय् विकासया योजना च्वयाः सम्बद्ध मन्त्रालयतय्त बियाच्वंगु दु । सांसदतय्सं नं थ्व ई धइगु हे सिंहदरवार धावे जुइगु ई खः धासें थःपिं आः वहे ज्या यानाच्वनागु खँ धयाच्वंगु दु ।

सांसदतय्सं जनताया दथुइ यानागु प्रतिवद्धता पूवंकेमाःगु दु धासें उकिया लागिं बजेट फ्वनेगु यानाच्वंगु खः । सिंहदरवार गांगामय् थ्यन धाःसां सांसदतय् चहपह स्वयेबलय् सिंहदरवार अझ नं येँय् हे केन्द्रित जुयाच्वंगु महसुस जूगु खँ बजेट दयेकेगु ज्याय् सक्रिय कर्मचारीतय्सं धायेगु यानाच्वंगु दु ।

गुलिखे सांसदतय्सं निर्वाचनया इलय् जनतालिसे यानागु प्रतिवद्धता पूवंकेमाःगुलिं सिंहदरवार वयेमाःगु खँ धायेगु यानाच्वंगु दु । अथे हे बजेट माग यायेत वइपिं सांसदतय्सं नेपाःया विद्यमान अर्थ राजनीतिक परिस्थितिं यानाः सांसदयात विकासपाखें बिस्कं तये मजिउगु खँ धायेगु यानाच्वंगु दु ।

उमिसं धायेगु यानाच्वंगु दु, ‘सांसदयात कानून दयेकेगु ज्या जक याकेगु युरोप व अमेरिकाया थेंज्याःगु अवस्था नेपालय् मदु, जिमिसं विकासया म्हगस इनाः चुनाव त्याका वयागु खः ।’ गुलिखे सांसदतय्सं धाःसा लः, धः, हिति, लँ, स्कुल आदि दयेके धकाः त्याका वयागु खः, अथे मधाःसा भोट वइ मखु, अले जिमित कानून जक दयेकि धयां मिले जुइ ला धकाः न्ह्यसः थनेगु नं यानाच्वंगु दु ।

अर्थ मन्त्रालय स्रोतया कथं सांसदतय्सं थःपिनिगु लेटर प्याडय् च्वयाः विकासया आपालं ज्याझ्वःत सिफारिस यानाः छ्वया हयाच्वंगु दु ।
संघीयता वयेधुंकाः नं केन्द्रयाके विकास फ्वनेगु सांसदतय्गु थज्याःगु ज्यां संघीयतायात गन थ्यंकीगु खः धइगु न्ह्यसः नं पिदंगु दु ।

कर्मचारी स्रोतया कथं सांसदतय्सं स्थानीय तहपाखें जुइगु चिचीधंगु विकासया ज्याय् तकं केन्द्रपाखें बजेट तया बी माल धकाः इनाप यानाच्वंगु दु । सांसदतय्सं निगू प्यंगू लाख तकाया बजेट तकं तया बी माल धकाः यानाच्वंगु माग स्वयेबलय् देशय् विकासया दयनीय अवस्था खने दुगु खँ कर्मचारीतय्सं धाःगु दु ।