युरोपय् नेपाली विमान प्रतिबन्ध मचीकीगु

येँ – युरोपेली संघं नेपाःया विमानयात हाकुगु धलखय् मचिइकीगु जूगु दु । युरोपेली संघं खुदँ न्ह्यवनिसें नेपाली विमानयात युरोपेली आकाशय् ब्वये मदइकथं प्रतिबन्ध तयातःगु दु । नेपाः सरकारया उड्डयन सम्बन्धी छुं प्रावधान सच्चे मयायेकं हाकुगु धलखं लिकाये मफइगु खँ संघं धाःगु दु ।

युरोपेली संघं विशेष यानाः नेपाल नागरिक उड्डयन प्राधिकरण (क्यान)या संचालक समितिइ विमान संचालकतय्त हे तयातःगुयात स्वीकार यायेफइमखु धयाच्वंगु खः । संघं स्पष्ट रुपं विमान संचालकतय्त क्यानं मचिइकं हाकुगु धलखं चिइके मफइगु खँ धाःगु खः ।युरोपेली संघं थुकियात कयाः पर्यटन मन्त्रालययात छपु पौ हे छ्वयाहःगु खः ।

उगु पतिइ गुबलय् तक विमानया अनुगमन व निरीक्षण यायेमाःगु निकायय् हे उगु हे निकायया प्रतिनिधि च्वनीगु व्यवस्था अन्तर्राष्ट्रि नागरिक उड्डयन प्राधिकरण (आइकाओ)या नियम कथं मिले मजू धासें थ्व प्रावधान मचिइकं हाकुगु धलखं चिइके फइमखु धयातःगु खँ मन्त्रालयया स्रोतं धाःगु दु ।

नेपाल नागरिक उड्डयन प्राधिकरण –क्यान)य् विमान संचालकपाखें निम्ह पदेन सदस्य जुइगु प्रावधान तयातःगु दु । युरोपेली संघं थ्व हे प्रावधानयात स्वीकार यायेफइमखु धयाच्वंगु खः । संघं न्हापा हे थथे स्पष्ट रुपं हे थज्याःगु प्रावधान स्वीकार यायेफइमखु धयाच्वंसां सरकारं धाःसा थ्व प्रावधान चिइकेगु पाखे वास्ता हे मयासे नेपाःया विमानयात हाकुगु धलखं चिइकी धकाः दावी यानाच्वंगु दु ।

थौंकन्हय् नेपाल वायुसेवा निगमया संचालक छम्ह व प्रधानमन्त्री केपी ओली लिसे सतिम्ह व्यापारी सोनाम शेर्पां चले यानाच्वगु हिमालयन एयरलाइन्सया छम्ह प्राधिकरणय् दुजः जुयाच्वंगु दु ।