बुंगद्यः साले न्ह्यः किपुली च्वंपिं मिस्तय्त स्वां
किपू – बुंगद्यःया रथ जात्राया झ्वलय् जावलाख्यलय् रथ साले स्वयां प्यन्हु न्ह्यः किपूया प्यंगःथामय् बुंगद्यःया पाञ्जुपिं वयाः स्वां बीमाःगु चलन दु । थ्व चलन कथं म्हिगः किपुली स्वां बीगु ज्या जूगु दु । न्हापा न्हापा जूसा पाञ्जुपिं प्यंगःथामय् वयाः स्वां बीगु अले अन वयाच्वंपिंत बाखं कनाः वनेगु जक याइगु खःसा थुगुसी धाःसा छगू कथं जात्रा हे जुल ।
बुंगद्यःया पाञ्जुपिं किपूया प्यंगःथामय् थ्यंकाः अन इहिपा मजूनिम्ह मिसायात स्वां बीगु खः । म्हिगः किपुलिं पिने ताँल्चा धइगु थासय् तक बाजा गाजा सहित हे पान्जुपिंत लँ स्वः वन । नापं अनंनिसें पाञ्जुपिंत किपुली तक लसकुस हे यानाः हयेगु ज्या यात । उलि जक मखु सलंसः मिसापिं हाकुपतासि सिनाः जात्राय् वने थें हे समाः यानाः पाञ्जुपिंत प्यंगःथामय् तक हयेगु ज्या याःगु खः ।
थुकियात बुंगद्यःया पाञ्जुपिंसं नं आः तक गबलें मजूनि कथंया लसकुस धाःगु दु । थ्वलिसे सम्बन्धित बाखं कथं बुंगद्यः छक्वः प्यंगःथामय् ख्यालि वःगु इलय् लिहां मवँसे अन च्वनाच्वंगु जुयाच्वन । लिपा जात्रा याये त्ययेकाः नं द्यः रथय् मदुसेंलि पाञ्जुपिं वयाः स्वां बियाः फ्यानाः बुंगद्यःयात यंकेगु यानाच्वंगु खः धाइ ।
अथे स्वां बीत वइगु इलय् थ्वहे बाखं नं कनेगु याइ । किपुली इहिपा मजूनिम्ह मिसायात स्वां बीगु थ्व ज्यां बुंगद्यःनाप किपूया क्वातुगु स्वापू दु धकाः स्पष्ट याः । सोमवाः बुंगद्यःया जला पाञ्जु मणिरत्न शाक्यया नेतृत्वय् छगू पुचः वःगु खः । थुगु इलय् वय्कःपिं बुंगद्यःया रथ तयातःगु थासंनिसें न्यासि हे वयेमाःगु चलन दु ।
अले स्वां बियाः वनेधुंकाः प्यन्हु दुकुन्हु जक जावलाख्यःया निंतिं रथ साली । रथ सालेगु नितिं किपुलिं नं विशेष पुजा वनेमाःगु चलन दु । उकिं बुंगद्यःया थ्व ज्याउला जात्रायात हे किपूमितय्सं थःपिनिगु जात्राया रुपय् नाला वयाच्वंगु दु । बुंगद्यःया रथ जात्रा गबलेनिसें सुरु जूगु खः अबलेनिसें हे बुंगद्यःया पाञ्जुपिं किपूया प्यंगःथामय् वना स्वां तःवनेगु चलनं याना वःगु जुइमाः धइगु अनुमान दु ।
LEAVE YOUR COMMENTS