गुबलें ज्याथ मजूम्ह भन्ते

न्हापां गुरुवर श्रद्धेय अश्वघोष महास्थविरयात कोटि कोटि वन्दनाया छपासः श्रद्धा देछाये ।

‘आचरण शुद्ध या, व्यवहार बांलाकि, विद्वान जुइगुपाखे जकलगे जुइमते, भिंम्ह मनू जुइगु स्व ।’ थ्व खः पूज्य अश्वघोष महास्थविरया वाणी । थ्वहे धापुतिइ केन्द्रित जुयाः वसपोलं बुद्ध शिक्षा बियाबिज्याइ, प्रवचन बियाबिज्याइ, अले सफू च्वयाबिज्याइ । बुद्ध शिक्षा प्रचार यायेगु झ्वलय् सम्पूर्ण जीवन बुद्ध शासनय् फ्यानाबिज्यात । त्यागी जीवनया ज्वलन्त उदाहरण बियाबिज्यात वसपोलं ।

छथाय् जिं च्वयागु दु, ‘न्हय्न्हय्दँ (७७) या उमेरय् थ्यनाः नं ल्याय्म्हया जोश मतंकुसे बुद्धधर्म प्रचारया लागि उखेंथुखें ब्वाँय् जुयाच्वनाबिज्याःम्ह पूज्य अश्वघोष महास्थविरयात बौद्ध जगतं विभिन्न पक्षं म्हसिउ ।’(पेज ७७, धर्मकीर्ति वर्ष, २२, अंक २, ज्यापुन्हि, जेष्ठ २०६१, अश्वघोष भन्ते विशेषांक, श्रद्धेय भिक्षु अश्वघोष महास्थविर ७७ क्यंगु व प्रवजित जुयाबिज्याःगु ६० दँ क्यंगु लसताय्) ।

उबलय् जिं बिचाः यानागु खः– न्हय्न्हय्दँ धयागु उमेर ला भन्तेयात ल्याय्म्ह उमेर हे तिनि खनीसा । ई बिनावं वन । भन्तेया जोश जाँगर उत्थें हे, गबलें गन गामय् गबलें गन गामय् बौद्ध जागरण शिविरय् सा गबलें भ्वँतय् ध्यानकुटि विहारय्, गबलें संघारामय्, गबलें श्रीघः विहारय्, गबलें लुम्बिनीइ ।

भन्तेया जोश जाँगर हाकनं छकः लनास्वये । ‘गुरु दक्षिणा’ सफुलिइ डा. रीना तुलाधरं च्वयातल ‘सकल धर्मचारीपिंसं बुद्धया व्यावहारिक शिक्षायात नालाः थःथःगु आचरण भिंके फयेमा’ धयागु भन्तेया धर्मदेशनाया तातुना थें तुं बुद्ध धर्म चिरस्थायी यायेत थौं ८६ (चय्खुदँ)या उमेरय् नं वसपोलया पलाः धिसिलाक्क न्ह्यानाच्वगु दनि ।

(गुरु दक्षिणा, रीना तुलाधर बनिया, वि.सं. २०६९)थुकथंवसपोल गुबलें ज्याथः मजू । भन्ते म्हंफुला धकाः न्यनेगु नं वसपोलयात मयःगु जुयाच्वन । जीवनया पलपल जागरुक जुयाः वसपोलं जीवनयात धन्य यानाबिज्यात । धाधां वसपोल ९० दँ क्यन, ९२ दँ क्यन… ।
गुरुवर श्रद्धेय अश्वघोष महास्थविरया धर्मकीर्ति बौद्ध अध्ययन गोष्ठीप्रति अतुलनीय योगदान दु ।

वि.सं. २०२८ सालं स्थापना जूगु उगु गोष्ठी श्रद्धेय अश्वघोष भन्ते व श्रद्धेय धम्मवती गुरुमांया कुशल नेतृत्वया कारणं थौं पीन्हय्दँ (४७) तक मदिक्क सक्रिय जुयाच्वंगु दु । धर्मकीर्ति विहारया आवासिय गुरुमांपिं व थनया उपासक उपासिकातय्गु मंकाःकुतलं थुगु गोष्ठी मदिक्क न्ह्यानाच्वंगु खः ।

पूज्य अश्वघोष भन्तें उगु बखतय् छवाःया छक्वः जुइगु कक्षाय् बुद्ध शिक्षा बाहेक च्वसु च्वयेगु, माइकया न्ह्यःने च्वसु ब्वनेगु, सभापति जुइगु, सभापतिया न्वचु बीगु, रिपोर्ट च्वयेगु मेमेगु कक्षाय् रिपोर्ट न्यंकेगु आदि कला नं स्यनाबिज्याःगु खः । पब्लिक स्पीकिङ्ग धकाः टे«निङ्ग काःवनेगु चलन मदुबलय् वसपोलं थुज्वःगु कला स्यनाबिज्याःगु खः ।

गोष्ठीं वसपोलया योगदान लुमंकेत वसपोलया कक्षाया विवरण हे प्रकाशन याःगु दु । गोष्ठीया कोषाध्यक्ष श्यामलाल चित्रकारं, ‘धर्मकीर्ति बौद्ध अध्ययन गोष्ठीले संचालन गर्दै आएको कक्षाहरू मध्ये संघनायक श्रद्धेय अश्वघोष महास्थविरले लिनु भएको कक्षाहरूको विवरण (२०७१)’ तयार यानादीगु खः । वि.सं. २०२८ साल निसें वि.सं. २०७१ साल तकया विवरण थुकी दु ।

थुकी न्ह्यथनातःगु कथं गोष्ठी जुइगु कक्षा मध्ये वि.सं. २०५३ सालय् दकलय् अप्वः दछिइ झिंस्वगू कक्षा कयाबिज्याःगु दुसा २०३१, २०३२, २०५४ व २०६७ सालय् दछिया झिगू झिगू कक्षा कयाबिज्याःगु दु । थुकी न्ह्यथनातः कथं वि.सं. २०७१ आश्विनय् स्वाहाने गये थाकुसांतबि वसपोलया कक्षा जूगु दु । रेकर्ड कथं २०७१ य् दछिया प्यंगू कक्षा वसपोलया जूगु दु ।

थुकिं वसपोल बुद्धशिक्षा प्रचार ज्याय् गुलि जागरुक धयागु क्यनाच्वंगु दु । सछिं मल्याक वसपोलाय कृति पिदंगु ला जु हे जुल । आः वसपोलया बारे पिदंगु छुं छुं कृति नं थन न्ह्यथनेबह जूगु तायेका–

१) धर्मकीति (श्रद्धेय अश्वघोष महास्थविर प्रवजित जुयाबिज्याःगु ६० दँ क्यंगु लसताय् विशेषांक)ः वर्ष २२, अंक २, ज्यापुन्हि, जेष्ठ २०६१, सम्पादक मण्डल– लोचनतारा तुलाधर, रीना तुलाधर, सुरेशकिरण मानन्धर, राजा वज्राचार्य

२) नेपालमा बुद्धधर्म समुन्नतिको लागि भिक्षु अश्वघोष महास्थविरको योगदान ः ले. भिक्षु संघरक्षित, प्रकाशक – सत्य सन्देश प्रचारक प्रकाशन, काठमाडौं वि.सं. २०६१ वैशाख ।

३) अग्ग महासद्धम जोतिक धज भिक्षु अश्वघोष महास्थविर ः ले. रत्नसुन्दर शाक्य, प्रकाशक– युवा बौद्ध समूह, वि.सं. २०६२

३) गुरु दक्षिणा ः रीना तुलाधर (बनिया), प्रकाशक धर्मकीर्ति बौद्ध अध्ययन गोष्ठी, वि.सं. २०६९ ।

४) सूचक (श्रद्धेय अश्वघोष विशेष) ः वर्ष १०, अंक ६७, जेठ २०७३, प्रकाशक÷सम्पादक दीपक भेटुवाल, संयोजक –घनश्याम राजकर्णिकार ।

५) भिक्षु अश्वघोषका छानिएका रचनाहरूः सम्पादक– कोण्डन्य, प्रकाशक – बुद्धविहार भृकुटी मण्डप, वि.सं. २०७५

थुपिं प्रकाशनय् वःगु सफू मध्ये ‘भिक्षु अश्वघोषका छानिएका रचनाहरू’ सफूया विशेष महत्व दुगु थें जिं ताया । श्रद्धेय भन्तेया ९२ दँ बुन्हिया लसताय् लाकाः २०७५ असार १२ गते कुन्हु भिक्षु कोण्डन्य महास्थविरं उगु सफू थः गुरु अश्वघोष भन्तेयात देछायाबिज्याःगु खः । थ्व तसकं आदर्शमय पुण्यया ज्या जुयाबिउगु दु ।

थ्व सफूया साधुवादय् पूज्य अश्वघोष भन्तें च्वयाबिज्याःगु दु, ‘९१ दँ पुलाः ९२ दँ थ्यनिन, अय्नं छुं च्वये ला धयाथें च्वं । तर न्हापा थें मजुल, ‘जरापि दुक्खा’ धयागु थ्व हे जुयाच्वन ।’हानं मेथाय् च्वयाबिज्यात, ‘बुद्धधर्म मेगु थें साम्प्रदायिक भावनां प्रेरित धर्म मखु । व्यवहारिक धर्म खः धकाः जनसमक्ष पेश यायेगु हे जिगु च्वयेगुया उद्देश्य खः ।’

जीवनपर्यन्त थ्व हे धापुतिइ च्वनाः वसपोल न्ह्यज्याना च्वनाबिज्याःगु खँ सकसिनं खना हे च्वंगु दु । वसपोलया ख्वाः न्ह्याबलें जल्लं थी, यचुसे पिचुसे मैत्रीया किरण संप्रेषन जुयाच्वंगुलिं मखा जुइ ।
थुकथं गुरुवर अश्वघोष भन्तेया गुण लुमंके, लुमंकावं च्वने… लुमंकावं च्वने …. ।

सम्बन्धित बुखँ

LEAVE YOUR COMMENTS