मस्तय्त दायेवं उमिसं सही गलत थुइकेफइमखु

– मस्तय्सं छु ज्या गुकथं याःसा जिउ धयागु छिगु चाहना खः, अज्याःगु ज्या छिं न्हापा हे मस्तय्त बांलाक स्यनादिसँ । मस्तय्सं थःपिंसं यानाच्वनागु ज्याया तरिका गलत धयागु मसिइ नं फु ।

– दायेगु यानाः मस्तय्त समस्या समाधान यायेगु स्यनेफइमखु, बरु उमित झन दुःखी जक याइ । दाइगु कारण मचाबलय् अनुभव यायेमाःगु आत्मग्लानि उमिगु जीवंकाछि कायम जुयाच्वनेफु । उकिं उपिंलिसें गज्याःगु भाय् न्ववानाच्वना धयागु खँय् नं ध्यान बियादिसँ । झीसं न्ववायेगु शब्द व भाषां नं उमित दायेबलय् थें आघात लाकाच्वंगु दयेफु ।

– मस्तय्त दायेगु यात धाःसा उपिं झन क्रूद्ध, आक्रामक व तंगुलु जुयाः पिहां वयेफु । उमिके नं ब्वलासायेगु भावना ब्वलंकाबीफु । उकिं उमिसं छु गल्ती यात, गुकथं गल्ती यात धयागु बांलाक थुइका बियादिसँ ।

– शारिरीक रुपं कसा बिइवं मस्तय्सं छु सही, छु गलत धयागु छुटे यायेफइमखु । उकिं मस्तय्त दायाः हे कजय् यायेमाः धयागुया छुं अर्थ दइमखु । मस्त खनाः तं वःसा छुं ई उपिं लिसे च्वनादीमते । न्हापां थःगु तं क्वलाकादिसँ, मस्त प्रति थःगु बिचाः सकारात्मक यानादिसँ । छिं उमिगु पाखें गज्याःगु व्यवहार याःगु स्वये चाहे जुयागु खः व बारे न्हापा हे थुइकेगु यानादिसँ ।

– मस्तय्त दायेगु धयागु उमित नं ‘मेपिंत दायेगु नं बांलाःगु हे खँ खः’ धयागु शिक्षा बीगु थें खः । मस्तय्सं तःधिकःपिं पाखें हे सयेका काइगु खः । छिं दाल धाःसा उमिसं नं मेपिंत दाये जिउ धयागु धारणा दयेकी । उकिं सुयातं मदासे, नुगलय् मस्याक थःगु खँ गुकथं तयेगु धयागु स्यनादिसँ । अले उमिगु भावना व उमिगु खँ नं न्यनेगु यानादिसँ । छिं उमिगु खँ थू, उमिगु बिचाः याना धयागु अनुभव याकादिसँ ।

सम्बन्धित बुखँ

LEAVE YOUR COMMENTS