खुसि त्वपुनाः दयेकातःगु संरचना थुन

येँ(नेपालभाषा टाइम्स)- येँ महानगरपालिकां खुसि हे त्वपुनाः दयेकातःगु संरचना चिइकेगु शुरु याःगु दु । सामाखुसिइ खुसि हे त्वपुनाः दयेकातःगु कंक्रिटया संरचना चिइकेगु शुरु याःगु खः ।

येँ महानगरपालिकां वडा नं. २६ सामाखुसि हे त्वपुनाः अनधिकृत रुपं ढलान यानाः दयेकातःगु कंक्रिटया संरचना चिइकूगु खः । महानगरं डोजर लगे यानाः खुसि त्वपुनाः दयेकातःगु संरचना चिइकूगु खः ।

सामाखुसिया खुसि अतिक्रमण यानाः दयेकातःगु कंक्रिटया ढलान, खुसि त्वपुइत प्रयोग यानातःगु संरचना दक्वं चिइकूगु खः । महानगरं खुसि त्वपुनाः दयेकातःगु संरचना चिइकेत छुं दिं न्ह्यः सुचं तकं जारी याःगु खः । उगु सुचंयात बेवास्ता यानाः संरचना चिइकेगु ज्या मजुइवं महानगर पालिका थम्हं हे उगु संरचना चिइकेगु ज्या न्ह्याकूगु खः । महानगर प्रहरीया कथं बेथां वनाच्वंगु लँपुइ दयेकातःगु ताँ बाहेकं मेगु सकतां अनधिकृत रुपं दयेकातःगु संरचना चिकूगु खः ।

सामाखुसिया सिथय् छेँ, टहरा लगायतया संरचना दयेकेबलय् सतकया निंतिं ४ मिटर त्वःमाःगु धयातःगु खःसां उकथं थाय् मत्वःतुसे खुसि द्यःने स्ल्याब ढलान यानाः लँपुया रुपय् प्रयोग यानातःगु धासें महानगरं उकथंया संरचना चिइकूगु खः ।