सिभिलया संचालकय् सहमति

येँ – सिभिल बैंकय् संचालक समितिइ आः न्हूपिं वइगु जूगु दु । बैंकया प्रमुख लगानीकर्ता दथुइ संचालक समितिइ वइपिं मनूतय् नां बारे सहमति जुइधुंकूगु खँ सीदुगु दु । इन्टरनेशनल लिजिङ्ग फाइनान्स कम्पनीयात एक्वायर यायेधुंकाः शेयरधनीतय् प्रतिनिधित्व याना वइपिं संचालकतय् नामय् सहमति जुइमफयाः दछि न्ह्यवनिसें बैंकयासाधारण सभा तकं जुइ मफयाच्वंगु खः ।

थ्व सहमति लिपा बैंकं वइगु वैशाख २७ गते छक्वलं निदँया साधारण सभा यायेगु कथं सभा सःतेधुंकूगु दु । थ्व हे साधारण सभां न्हूपिं संचालकत ल्यइगु खँ धाःगु दु । बैंकं आर्थिक दँ २०७३÷७४ व २०७४÷७५ या साधारण सभा छक्वलं यायेत्यंगु खः । थ्व साधारण सभां खुम्ह न्हूपिं संचालकत ल्ययेगु सहमति जुइधुंकूगु दु ।

समितिइ संचालकतय्पाखें इच्छाराज तामाङ्ग, अम्बीर बोगटी व प्रतापजंग पाण्डे वइगु व सर्वसाधारण शेयरधनीपाखें प्रकाश दाहाल, शम्भु पन्त व डम्बरबहादुर मल्लया काययात हयेगु सहमति जुइधुंकूगु खँ सीदुगु दु । मेम्ह छम्ह स्वतन्त्र संचालक धाःसा साधारण सभां वःपिं खुम्ह संचालकतय्सं ल्यइगु खँ धाःगु दु । बैंकं थ्व बारे धाःसा छुं न्ववाःगु मदुनि ।

अथेहे साधारण सभां आर्थिक दँ २०७३÷७४ पाखें १०.२५ प्रतिशत बोनस शेयर व ०.५४ प्रतिशत नगद लाभांस व आर्थिक दँ २०७४÷७५ पाखें ४.०५ प्रतिशत नगद लाभांस यानाः मुऽं १४.८४ प्रतिशत लाभंस नं पारित याइगु जूगु दु ।आर्थिक दँ २०७३÷७४ या १०.२५ प्रतिशत बोनस शेयर वयेवं बैंकय् ७४ लाख ९१ हजार कित्ता शेयर थप जुइगु जूगु दु ।

बैंकं उगु आर्थिक दँया अन्तिम तक कायम दुगु ७ अर्ब ३० करोड ८३ लाख चुक्ता पुँजी बराबरया ७ करोड ३० लाख ८३ हजार कित्ता शेयरया १०.२५ प्रतिशत बोनस शेयर बीगु निर्णय संचालक समितिं पारित यानाः नेपाल बैंकं नं स्वीकृति कयातयेधुंकूगु दु । उगु आर्थिक दँया साधारण सभा जुइमफुगुलिं जक शेयर पितबी मफयाच्वंगु खः ।

 

सम्बन्धित बुखँ

LEAVE YOUR COMMENTS