कन्हय् निसें आशा लघुवित्तया शेयर

येँ – आशा लघुवित्तया साधारण शेयरया आवेदन कन्हय् माघ १८ गते निसें चालीगु जूगु दु । आशा लघुवित्त प्रभु गु्रप अन्तर्गत संचालनय् जुयाच्वंगु संस्था खः । आशा लघुवित्तं सर्वसाधारणया निंतिं ६ लाख ७४ हजार कित्ता शेयर पितबीत्यंगु खः । थुकी मध्ये १०३७० कित्ता कर्मचारीतय्त व ३३७०० कित्ता म्युचअल फण्डया निंतिं छुटे यानाः ल्यंदुगु ६ लाख २९ हजार ९३० कित्ता शेयर सर्वसाधारणयात मीगु जूगु दु । थ्व शेयरया निंतिं माघ २२ गते दुने आवेदन बीमाः ।

आशा लघुवित्तय् मुक्कं १० कित्ता जक नं शेयर आवेदन यायेदइगु जूगु दु । साधारणतः मेमेगु कम्पनीइ न्यूनतम ५० कित्ता तक आवेदन यायेमाःगु प्रावधान दइगु खःसां आशा लघुवित्तं १० कित्ता नं आवेदन यायेफइगु याःगु खः ।
मेखे नेपाल स्टक एक्सचेञ्जं बुधवाः उन्नति माइक्रो फाइनान्सया शेयर भाः समायोजन याःगु दु । उन्नतिं ४०.५० प्रतिशत बोनस व २० प्रतिशत हकप्रद शेयर बीवं शेयर भाः समायोजन याःगु खः । समायोजन लिपा उन्नतिया शेयर भाः प्रतिकित्ता १२०८.७२ तका थ्यंगु दु । थुकीया आधार मूल्य धाःसा ६५४.३६ कित्ता थ्यनाच्वंगु दु ।