आर्थिक वृद्धिदर शून्यय् कुहां वइगु अनुमान

येँ (नेपालभाषा टाइम्स) – नेपाःया आर्थिक वृद्ध दर शून्यय् कुहां वइगु अनुमान याःगु दु। विश्व बैंकं सन् २०२१ य् नेपाःया आर्थिक वृद्धिदर ०.६ प्रतिशत जक जुइगु खँ धाःगु खः । विश्व बैंकं पिकाःगु दक्षिण एशियास्तरीय आर्थिक प्रतिवेदनय् नेपाःया आर्थिक वृद्धिदर शून्यय् कुहां वइगु खँ न्ह्यथनातःगु खः । सरकारं धाःसा चालु आर्थिक दँ २०७७/७८ य् ७ प्रतिशत आर्थिक वृद्धि जुइगु अनुमान यानातःगु दु ।

सरकारं वंगु आर्थिक दँ २०७६/७७ य् २.२७ प्रतिशत आर्थिक वृद्धिदर जुइगु खँ धाःगु खःसा विश्व बैंकं सन् २०२० या आर्थिक वृद्धिदर ०.२ प्रतिशत जक जुइगु धाःगु खः । कोरोना महामारी दुने लाःगु वंगु आर्थिक दँया आर्थिक वृद्धिदर धाःसा सरकारं आःतकं सार्वजनिक याःगु मदुनि। विश्वबैंकं कोरोना भाइरसया महामारीया कारणं दक्षिण एशियाली क्षेत्रया अर्थतन्त्र आःतकया दकलय् तःधंगु संकटय् लाःगु खँ धाःगु दु। सुक्ष्म मन्दीं अर्थतन्त्रं न्ह्याः वनाच्वंगु धासें बैंकं थुकिं यानाः अनौपचारिक क्षेत्रय् अप्वः मार लाइगु खँ धाःगु दु। आर्थिक क्रियाकलाप व पर्यटन क्षेत्रय्द कलय् बांमलाक लिच्वः लाःगु व थुकिं यानाः अनौपचारिक क्षेत्रय् रोजगारी मदयावंगु धासें आः दक्षिण एशियाली क्षेत्रय् चरम गरिबी जुइगु प्रतिवेदनय् न्ह्यथनातःगु दु ।