देय्न्यंकं विद्यार्थी भर्ना अभियान शुरु
येँ – देय्न्यंकंया दक्वं स्थानीय तह मार्फत विद्यार्थी भर्ना अभियान शुरु जूगु दु । शिक्षा, विज्ञान तथा प्रविधि मन्त्रालयया आह्वान व स्थानीय सरकारया अधिकारकथं वंगु सोमवाःनिसें देय्या ७५३ गुलिं स्थानीय तहपाखें विद्यालयया पहुँचं पिने लानाच्वंपिं सकलें विद्यार्थीयात विद्यालयया पहुँचय् थ्यंकेगु उद्देश्यलिसें भर्ना अभियान शुरु जूगु खः ।
‘झीगु नगर, झीगु गां, सकलें मस्तय्त विद्यालय थ्यंकेनु’ धइगु नारा बियाः उगु अभियान न्ह्याकूगु खः । मन्त्रालय अन्तर्गतया शिक्षा तथा मानवस्रोत विकास केन्द्र पुलांगु थिमिं विद्यालय पहुँचं पिने लानाच्वंपिं मस्तय्त विद्यालयय् थ्यंकेगु उद्देश्यं भर्ना अभियान न्ह्याकागु केन्द्रया निर्देशक गेहनाथ शर्मां जानकारी बियादिल ।
थुगु दँय् विद्यालय पहुँचं पिने लानाच्वंपिं ग्वीछद्वः मस्तय्त भर्ना अभियानपाखें विद्यालय भर्ना यायेगु लक्ष्य कयातःगु दु । थगुने ख्वीद्वः स्वयां अप्वः मस्त विद्यालय पहुँचं पिने लानाच्वंगु खःसां थुगुसी थ्व ल्याः अझ अप्वःगु अनुमान दु । ५ निसें ९ दँ तकया नीन्यागू लाख चय्स्वद्वः मस्त मध्ये थगुने नीप्यंगू लाख ग्वीनिद्वः मस्त विद्यालयय् भर्ना यायेगु ज्या जूगु खः ।
विद्यार्थी भर्ना अभियान बैशाख १५ गते तक न्ह्याकेगु व वयां लिपा घरदैलो अभियान संचालन यानाः भर्ना अभियान न्ह्याकीगु जूगु दु ।
शिक्षाया अधिकार स्थानीय तहय् वने धुंकूगु अवस्थाय् विद्यार्थी भर्ना अभियान स्थानीय तहं हे संचालन यायेमाःगु व्यवस्थाकथं थुगुसीनिसें संघीय सरकारं क्वःछिउगु नाराया लिधंसाय् देय्या दक्वं स्थानीय तहं वंगु सोमवाःनिसें विद्यार्धी भर्ना अभियान संचालन याःगु निर्देशक शर्मां कनादिल ।
LEAVE YOUR COMMENTS