प्रेस काउन्सिल अनलाइन उजुरी प्रणालीया उलेज्या

येँ- नेपाल प्रेस काउन्सिललिसे सम्बन्धित उजुरी आः अनलाइनपाखें हे बी फइगु जूगु दु । थ्व सम्बन्धी प्रणालीया आः नकतिनि उलेज्या जूगु दु ।
प्रधानन्यायाधिश गोपाल पराजुलीं काउन्सिललिसे सम्बन्धित उजुरी अनलाइनपाखें बी फइगु प्रणालीया छगू ज्याझ्वःया दथुइ उलेज्या यानादीगु खः । काउन्सिलं सूचना विभागय् ग्वसाः ग्वःगु अनलाइन उजुरी प्रणालीया उलेज्या यासें प्रधानन्यायाधिश पराजुलीं काउन्सिलं महत्वपूर्ण उपलब्धि हासिल याःगु धासें पेशागत आचरण कायम यायेत, नियमन–अनुगमन याये व स्वस्थ, सभ्य, मर्यादित, व्यवस्थित पत्रकारिताया विकास यायेत दक्वं पक्ष लगे जुइमाः धयादिल ।

दक्वं मौलिक हक निरपेक्ष मजूगु खँ न्ह्यथँसे थःत प्राप्त अधिकार सीमविहीन जुइगु व उकी सुयागुं नियन्त्रण, हद वा बन्देज दइमखु धइगु अवधारणां समाजया गुगुं नं संस्था, निकाय अपेक्षाकृत सशक्त जुइ मफइगु, सभ्य, शिष्ट, सोम्य पत्रकारितां मर्यादा कायम जुइगु, न्यायालयय् विचाराधीन मुद्दाय् प्रभाव लाइकथं संचारमाध्यमं प्रकाशा व प्रशारण जुइगु यानाच्वंगु, तिंख्यः, रत्नपार्क व माइतीघर मण्डलां निर्णय जुइगु खः धइगु जूसा लोकतान्त्रिक मूल्य व मान्यताकथं राज्यपाखें स्थापना जूगु निकायया अन्त्य नं व हे विन्दुं जुइगु स्पष्ट यासें न्यायालय जनआस्थाय् ल्यनाच्वंगु सः मदुपिनिगु संस्था जूगु वय्कलं धयादिल ।

प्रेस काउन्सिल नेपालया कार्यवाहक अध्यक्ष किशोर श्रेष्ठं मेगु लोकतान्त्रिक देय्या तुलनाय् नेपालय् प्रेस स्वतन्त्रताया अनुभूति अप्वः जूगु खँ न्ह्यथँसे पत्रकारया नामय् अराजक, ठगे याना जुइगु, प्रहरी अधिकारीयात तकं दुःख बीपिंत कारवाही यायेबलय् अदालतं पने मजिउगु खँय् ध्यानाकर्षण यासें छगू न्यायिक निकायं याःगु निर्णययात मेगु न्यायिक निकायं दोहोरे यानाः सुनुवाई मयासे स्टे अर्डर बीगु उपयुक्त मजू धयादिल । ज्याझ्वलय् नेपाल पत्रकार महासंघया अध्यक्ष नापं काउन्सिलया दुजः गोविन्द आचार्य, काउन्सिलया मेम्ह दुजः ईश्वरीप्रसाद ओझां नं नवादीगु ज्याझ्वलय् काउन्सिलया उपप्रशासकीय अधिकृत रामशरण बोहारां अनलाइन उजुरी प्रणालीया प्रयोग व काउन्सिलया समग्र गतिविधिया संक्षिप्त विवरणसहितया ज्यापौ न्ह्यब्वयादीगु खः ।