ने. सं. ११४४ कौलाथ्व पारू - नःलास्वनेगु

न्हूगु गठबन्धनय् विदेशीतय् तीव्र चिउताः

येँ (नेपालभाषा टाइम्स)- प्रधानमन्त्री पुष्पकमल दाहाल प्रचण्डं नेपाली कांग्रेसयात वांछ्वयाः एमाले सहित न्हूगु सत्ता समीकरण दयेकेवं नेपाःलिसेअन्तर्राष्ट्रिय सम्बन्ध नं च्वय्–क्वय् जुइगु सम्भावना ब्वलंगु दु । थुकिं यानाः नेपाःया जःलाखःला देय् व शक्तिशाली देतय्सं प्रधानमन्त्री व परराष्ट्र मन्त्रीयात नापलायेगु क्रम अप्वःगु दु ।

थ्वहे झ्वलय् नेपाःया निंतिं अमेरिकी राजदूत डिन थम्पसनं नं न्हूम्ह अर्थमन्त्री वर्षमान पुनयात नापलानाः द्विपक्षीय खँल्हाबल्हा यानादीगु दु । वय्कलं खास यानाः ‘मिलेनियम च्यालेन्ज कर्पोरेशन’ (एमसीसी) परियोजना इलय् हे सम्पन्न यायेत इनाप याये कथं अर्थमन्त्री नापलानादीगु खः ।

राजदूत थम्पसनं अर्थमन्त्री पुनयात नापलायेगु झ्वलय् संक्रमणकालीन न्याय सम्बन्धी विधेयक व एमसीसी परियोजना बारे थःपिनि चिउताः प्वंकादीगु खः । लिसें वय्कलं नेपाःया शान्ति प्रक्रियायात निष्कर्षय् थ्यंकेत ल्यं दनिगु ज्याय् थःपिंपाखें ग्वाहालि यायेगु प्रतिबद्धता नं प्वंकादीगु खँ अर्थमन्त्री पुनया सचिवालयं धाःगु दु ।

राजदूत थम्पसनं संक्रमणकालीन न्याय सम्बन्धी विधेयक याकनं क्वःजीगु व वयां लिपा शान्ति प्रक्रियाया ज्यां तीव्रता काइगु विश्वास प्वंकादीगु खः । राजदूत थम्पसनं शान्ति प्रक्रियाया ल्यं दनिगु ज्या पूवंकेत माःगु आर्थिक ग्वाहालि यायते समेत अमेरिका तयार दुगु व विश्वया मेगु देशं नं ग्वाहालि यायेत तत्पर दुगु खँ नं धयादीगु खः ।

लिसलय् अर्थमन्त्री पुनं अमेरिकां नेपाःया समग्र विकासय् याना वयाच्वंगु ग्वाहालि स्मरण यासें वइगु न्हि नं ग्वाहालिया नितिं प्रतिबद्धता प्वंकूगुलिं राजदूत थम्पसनयात सुभाय् देछासें एमसीसी परियोजना न्ह्यायेधुंकूगु व उकियात पूवंकेत सरकार प्रतिबद्ध दुगु खँ धयादीगु खः ।

उकथं हे राजदूत थम्पसनं म्हिगः उपप्रधान लिसें परराष्ट्र मन्त्री नारायणकाजी श्रेष्ठयात नं नापलानादीगु दु । उगु नापलायेगु ज्याय् नं वय्कलं अमेरिकां न्ह्याकेत्यंगु एमसीसी परियोजना बारे विशेष चिउताः प्वंकादीगु खः ।

थ्वहे झ्वलय् नेपालय् सत्ता गठबन्धन हिलेवं चीनया छगू प्रतिनिधि मण्डल नं नेपाः भ्रमणय् वःगु दु । चिनियाँ जनमुक्ति सेनाया अन्तर्राष्ट्रिय मिलिटरी कोअपरेशन अफिसया उपप्रमुख उपरथी चाङ बाओक्वानया नेतृत्वया पुचः वंगु शनिवाः हे नेपाः वःगु खः ।

उगु पुचलं म्हिगः हे सैनिक मुख्यालय वनाः प्रधानसेनापति प्रभुराम शर्मायात नापलाःगु खः । नापलायेगु झ्वलय् निगुलिं देय्या लिसें नेपाली सेना व चिनियाँ जनमुक्ति सेना दथुइ दयाच्वंगु सम्बन्धयात कयाः सहलह जूगु खँ नेपाली सेनां धाःगु दु । खुम्ह दुजः दुगु चिनियाँ पुचलं नेपाःया थीथी क्षेत्रया भ्रमण याइगु ज्याझ्वः दुसां नं नेपाःया राजनीतिक पार्टीतलिसे सहलह याइगु बारे धाःसा छुं खँ स्पष्ट याःगु मदुनि ।