ने. सं. ११४३ ञलाथ्व चतुर्दशी -

भियतनामय् फसं सरे जुइगु कोरोनाया न्हूगु भेरियन्ट

एजेन्सी- भियतनामय् फसं हे सरे जुइगु कोरोना भाइरसया न्हूगु भेरियन्ट लुइकूगु दु । थ्व भेरियन्ट भारतीय व बेलायी भेरियन्टया मिश्रित स्वरुप जूगु खँ धाःगु दुसा थ्व फय्पाखें याकनं हे सरे जुइगु खँ नं धाःगु दु ।

भियतनामया स्वास्थ्यमन्त्री गुयन थान्ह लङ्गं शनिवाः थ्व भेरियन्ट बारे व्याख्या यासें थ्व तसकं खतरनाक जूगु खँ धयादीगु दु ।
भाइरसत उत्परिवर्तन जुयाच्वनी, तर यक्व थें भेरियन्ट महत्वपूर्ण जुइमखु, तर छुं छुं भेरियन्ट धाःसा थप संक्रामक जुइ । भियतनामय् लुइकूगु न्हूगु भेरियन्ट थज्याःगु संक्रामक भेरियन्ट खः ।

रोयटर्सया कथं भियातनामया स्वास्थ्यमन्त्री गुयनं छगू सरकारी बैठकय् भियतनामय् भारत व युकेय् खनेदुगु भेरियन्टया मिश्रित गुण दुगु कोभिड १९ या न्हूगु भेरियन्ट खनेदुगु जानकारी बिउगु खः । वय्कलं थ्व भेरियन्ट न्हापा खनेदुगु स्वयां तसकं हे संक्रामक जूगु व थ्व विशेषत फसं हे सरे जुइ धकाः नं धयादीगु दु ।

भियतनामी अनलाइन पत्रिका भिएन एक्सप्रेसया कथं छुं विरामीतय्के यानास्वःगु परीक्षणय् थ्व भेरियन्ट खनेदुगु खँ स्वास्थ्यमन्त्री गुयनं धयादीगु दु । वय्कलं थ्व भेरियन्टया वंशाणुगत संकेत याकनं हे उपलब्ध याकेगु खँ नं धयादीगु दु ।

थगुने अक्टोवरय् न्हापांखुसी भारतय् खनेदुगु बी १.६१७.२ भेरियन्ट व बेलायतय् खनेदुगु बी १.१.७ भेरियन्ट तसकं संक्रामक भाइरस खः । थुपिं हे निगू भेरियन्ट आः न्हूगु याकनं सरे जुइफुगु भेरियन्ट खनेदुगु खः । तर विज्ञतय्सं उत्परिवर्तन जूगु भाइरसं यक्व मनूतय्त यक्व गम्भीर ल्वचं कयेकूगु छुं प्रमाण लूगु मदुनि धाःगु दु । सुरुया भाइरसं हे ज्येष्ठ उमेरयापिंत उच्च जोखिमय् लाकाच्वंगु विज्ञतय् धापू दु ।

तर संक्रमण अप्वइगु कारणं यानाः यक्व मनूतय्त संक्रमण जुइगुलिं मृत्युया ल्याः नं अप्वयेफुगु खँ विज्ञतय् धापु दु ।

थौंकन्हय् भियतनामय् नं कोभिड १९ संक्रमण अप्वः खने दयावःगु दु । महामारी सुरु जुइधुंकाः निसें थन आःतक ६७०० म्हेसित संक्रमण पुष्टि जुइधुंकूगु दु । थुपिं मध्ये वंगु अप्रिलय् हे अप्वः मनूतय्के संक्रमण खनेदुगु खः ।