गन थ्यन लानिपुखू दयेकेगु खँ ?

येँ – भुखाचं क्षति जूगु लानिपुखू आः गज्याःगु शैलीं दयेकेगु धकाः ताःहाकः विवाद पिहां वःगु खःसां आः धाःसा थुकिया चर्चा हानं ध्याकुनय् लाः वंगु दु । तर थ्वहे दथुइ लानिपुखू आःपुलांगु हे प्रविधि व शैलीं दयेकेगु बारे सहलह जूगु खँ सीदुगु दु ।
संस्कृति मन्त्री रविन्द्र अधिकारी, येँ महानगरपालिकाया प्रमुख विद्यासुन्दर शाक्य, उपमेयर हरिप्रभा खड्गी व पुरातत्व विभागया प्रतिनिधि दथुइ म्हिगः थुकिया बारे सहलह जूगु खँ उपमेयर श्रेष्ठं ‘नेपालभाषा टाइम्स’यात कनादिल ।

मेयर विद्यासुन्दर शाक्यं नं ‘नेपालभाषा टाइम्स’ लिसे खँल्हासें आः याकनं हे लानिपुखू दयेका छ्वयेगु धकाः निर्णय जूगु जानकारी बियादीगु दु । वय्कलं कनादी कथं अन दयेकातःगु कंक्रिटया संरचनायात पूवंक हे स्यंकाः पुलांगु हे शैलीं दयेकेगु धकाः निर्णय जूगु खः । वय्कलं न्ह्यःने धयादी, ‘ऐतिहासिक कथं पुलांगु हे शैलीं लानिपुखू दयेकेगु जुइ ।’लानिपुखू पुलांगु शैलीं दयेकेबलय् अन लः गय् यानाः मुंकेगु धइगु विषयय् नं विवाद जुयाच्वंगु दु । थुकिया बारे मेयर शाक्यं गुलिस्यां पुखूया लः पिहां वनाच्वन धाइगु व गुलिस्यां दुहां वयाच्वन धायेगु यानाच्वंगु कारणं थ्व खँ आः दयेकेगु झ्वलय् हे जक सीदइगु बिचाः तयादिल ।

लानिपुखुली यदि लः बुया मवल धाःसा अन पिनें हयाः जूसां लः क्वफायेमालीगु खँ नं सहलहय् पिहां वःगु खः । पुखुली लः क्वफाये माल धाःसा दँय् खुगू करोड तका दां लःया लागिं जक खर्च याये मालीगु अनुमान यानातःगु दु । उकिं उलिमछि ध्यबा खर्च यायेगु उचित मजुइगु बरु अन हे स्वंगू प्यंगू फिट म्हुल कि लः वइगु जूगुलिं वहे उपाय याये मालीगु खँ वःगु खः ।