ने. सं. ११४६ बछलागा चौथी -

ग्वंगःबुँइ गोलीं कयेकल

येँ – शंकास्पद गतिविधि याःगु द्वपनय् प्रहरीं छम्हेसित गोलीं कयेकूगु दु । थनया ग्वंगःबुँइ च्वंगु छगू होटलय् च्वनाच्वंम्ह काभ्रेया अभिलास तामाङयात प्रहरीं गोलीं कयेकाः ज्वंगु खः । येँ प्रहरी परिसरया डीएसपी होविन्द्र बोगटीया नेतृत्वय् वंगु पुचलं होटल नक प्रालिया १०४ नम्बर क्वथाय् वनाः गोलीं कयेकूगु खँ धाःगु दु ।

तामाङया तुतिइ गोली लाःगु खँ प्रहरीं धाःगु दु । गोलीं कयाः घाःपाः जूम्ह तामाङयात त्रिवि शिक्षण अस्पताल महाराजगञ्जय् तयातःगु दु । डीएसपी बोगटीया कथं म्हीग बहनीनिसें होटलय् च्वनाः तामाङं शंकास्पद गतिविधि यानाच्वंगु सुचं वःगु व उगु हे आधारय् मंगलवाः बहनी प्रहरी पुचः थ्यंगु इलय् पेस्तोल क्यंगुलिं गोली चले यायेमाःगु खँ प्रहरीं धाःगु दु । तामाङपाखें प्रहरीं छपु पेस्तोल व खुगू राउन्ड गोली नं बरामद याःगु दु ।