छायादेवी विरुद्ध युनेस्कोय् उजुरी

येँ – थँबहीया पुलांगु पलेस्वां पुखू हड्पे यानाः उकिया थासय् छायादेवी कम्प्लेक्स दयेकूगु खँयात कयाः राष्ट्र संघीय निकाय युनेस्कोय् नं उजुरी दर्ता जूगु दु । थ्व मुद्दायात कयाः सक्रिय जुयाच्वंगु नेवाः राजनीतिक अभियानपाखें थुकियात कयाः नेपाःस्थित युनेस्कोया ज्याकुथी उजुरी दर्ता याःगु खः ।

येँ देय्या स्थानीय बौद्धमार्गीतय्सं द्वलंद्वःदँ न्ह्यवंनिसें धार्मिक सांस्कृतिक ज्याय् छ्यला वयाच्वंगु उगु पुखू हड्पे यानाः अन बिजनेश कम्प्लेक्स दयेकूगु खँ न्ह्यथँसें उजुरी पती थ्व ज्याय् सरकारया छुं भ्रष्ट अधिकारीत, गुथि संस्थानया छुं भ्रष्ट कर्मचारीत, सिंहसार्थबाहु गरुढ भगवान गुथिया छुं भ्रष्ट गुथियारत लगायत छायादेवी कम्प्लेक्स प्रालिया सञ्चालकतय्सं अनधिकृत रुपं मिलोमतो यानाः राष्ट्रिय व अन्तर्राष्ट्रिय रुपं नांजाःगु सम्पदा नष्ट याःगु खँ उल्लेख यानातःगु दु ।

थ्व ज्यां सम्पदा संरक्षण व स्थानीय संस्कृति माने यायेगु बारे संयुक्त राष्ट्र संघं जारी यानातःगु अन्तर्राष्ट्रिय घोषणापत्रया तकं उल्लंघन जूगु दु धासें अभियानया उजुरीपती थ्व ज्याय् ल्हाः दुपिं सकलें भ्रष्ट व छायादेवी कम्ष्लेक्सया सञ्चालकतय्त समेत कानूनया दायराय् हयाः दण्ड बीत लागिं युनेस्कोपाखें पहल याना बीत इनाप यानातःगु दु ।