‘बाहिरी चक्रपथय् भूमाफियां थिउगु लँ हे हिलेगु जुइ’

येँ – शहरी विकास मन्त्री मोहम्मद इस्तियाक राईं बाहिरी चक्रपथय् कलंकया सिन्हः तीत थः तयार मजूगु खँ धयादीगु दु । म्हिगः मन्त्रालयं ग्वसाः ग्वःगु पत्रकार सम्मेलनय् मन्त्री राईं उगु खँ धयादीगु खः । थः हथासं निर्णय यानाः फुर्सदय् पस्ताचाप याइम्ह मन्त्री मखु धासें कलंकया सिन्हः तीत थः तयार मजूगु खँ वय्कलं स्पष्ट यानादीगु दु ।

वय्कलं धयादी, ‘जि हथासं निर्णय यानाः फुर्सदय् पस्ताचाप याइम्ह मनू मखु, बाहिरी चक्रपथय् हथासं निर्णय यानाः हाकुगु सिन्हः तीत जि तयार मदु ।’छुं भूमाफियातय्सं बाहिरी चक्रपथयात घेराबन्दीइ तयाः असफल परियोजना दयेकेत कुतः यानाच्वंगु द्वपं नं वय्कलं बियादिल । वय्कलं धयादी, ‘छुं भूमाफियात ल्याण्ड पुलिङ जक यानाः आयोजना अलपत्रय् लाकाः जितः बदनाम यायेगु कुतः यानाच्वंगु दु, तर जि सचेत दु ।’

वय्कलं अर्थ मन्त्रालयपाखें सहमति वयेवं हे ७२ किलोमिटरया मुक्कं जग्गा रोक्का यायेगु घोषणा नं यानादीगु दु । मन्त्री राईं बाहिरी चक्रपथ आयोजनाया अलाइनमेन्टय् हिउपाः वइगु खँ नं कनादिल । वय्कलं धयादी, ‘अर्थ मन्त्रालयपाखें सहमति वःगु न्हिं कुन्हु मन्त्रिपरिषदय् छक्वलं हे फुक्कं जग्गा अधिग्रहण यायेगु प्रस्ताव यंकेगु जुइ, गन गन भूमाफियातय् जाः दु, अन अन अलाइनमेन्ट (लँपुया रुट) हिलेगु जुइ ।’

वय्कलं बाहिरी चक्रपथ दयेकेगु निंतिं स्रोत सुनिश्चित यायेत अर्थ मन्त्रालय इनाप यानागु जानकारी नं अन बियादिल ।बाहिरी चक्रपथय् जग्गा न्याये मी बन्द यानातःसां स्वद्वः स्वयां अप्वः जग्गा कित्ता काट जूगु खः ।