गुंला बाजं खलःयात आर्थिक ग्वाहालि

येँ- येँ महानगरपालिकां गुंला बाजं खलःयात आर्थिक ग्वाहालि याःगु दु । महानगरपालिकां २३ गू गुंला बाजं खलःयात म्हति निगू लख तका दरं आर्थिक ग्वाहालि बिउगु खः ।

येँ महानगरपालिकाया प्रमुख विद्यासुन्दर शाक्यं १५ वडा डल्लु आवासय् च्वंगु कसाः ख्यलय् जूगु ज्याझ्वलय् गुंला बाजं खलःया प्रतिनिधियात निगू लख दरं आर्थिक ग्वाहालि लःल्हानादीगु खः ।

अनुदान वितरण यासे महानगर प्रमुख शाक्यं अमूर्त सम्पदा बचे यायेगु नापं उकियात ल्यंका तयेगु निंतिं समुदायं म्हिता वयाच्वंगु भूमिका च्वछायेबह जूगु नापं महत्वपूर्ण जू धयादिल ।

थःपिंसं बियागु आर्थिक अनुदान खर्च यायेत मगाःसां नियमित खर्च व्यवस्थापन यायेत जूसां नं ग्वाहालि जुइ धइगु विश्वास प्वंकादिसें वय्कलं धयादिल, ‘सांस्कृतिक गतिविधिइ थाइगु परम्परागत बाजं ल्यंका तयेत व अज्याःगु बाजं थायेत समुदायं आपालं ई जक मखु, खर्च नं याना वयाच्वंगु दु । छिकपिनिगु थुकथंया धैर्यतायात प्रोत्साहन बीगु व जिमिसं नं छुं भचा ग्वाहालि याये धइगु ल्याखं नं अनुदान बियागु खः ।’

महानगरं बिउगु अनुदानं बाजं न्यायेत, प्रशिक्षण बीत व मेमेगु ज्याझ्वः संचालन यायेत ग्वाहालि जुइगु विश्वास नं वय्कलं प्वंकादिल ।

येँ महानगरया प्रवक्ता लिसें १५ वडाअध्यक्ष ईश्वरमान डंगोलं सम्पदा पुनःनिर्माणया कोणं स्वयेगु खःसा आःया ई स्वर्णिम ई जूगु धासें प्रमुख शाक्यया नेतृत्वया जनप्रतिनिधिं आपालं सांस्कृतिक, पुरातात्विक व धार्मिक महत्वया सम्पदा पुनःनिर्माण व संरक्षणया ज्या याःगु दु धयादिल ।

ज्याझ्वलय् येँ महानगर सम्पदा व पर्यटन विभागया प्रमुख अर्चना शाक्य व गुंला बाजं व्यवस्थापन तथा संरक्षण संघया नायः अमिरमान शाक्यं नं नुगःखँ तयादीगु खः ।