यँयाःलय् खटे जुइपिंत खोप
येँ – यँयाः जात्राय् खटे जुइपिंत कोरोना विरुद्धया खोप बीगु ज्या जूगु दु । येँ महानगरपालिकां यँयाः व्यवस्थापनय् खटे जुइपिं स्वसः स्वयां अप्वःसित कोरोना विरुद्ध भेरोसेलया न्हापांगु मात्राया खोप बिउगु खः ।
थनया मजिपाःस्थित लाखेननिइ जूगु खोप ज्याझ्वलय् नवासें येँ महानगर प्रमुख विद्यासुन्दर शाक्यं कोरोना भाइरसया संक्रमण व थुकिया महामारीपाखें बचे जुयाः परम्परायात ल्यंका तयेगु कुतःकथं खोप ज्याझ्वः संचालन यानागु खः धयादिल ।
विश्वव्यापी महामारी न्यना वंगु कोरोना भाइरस (कोभिड–१९)या जोखिमयात सामान्यकथं मकायेत इनाप यासें वय्कलं धयादिल, ‘छखे पुस्तौं न्ह्यवनिसें हना वयाच्वंगु नखःयात नियमित यायेमाःगु दुसा मेखे सांस्कृतिक जात्रा परम्परायात नं निरन्तरता बीमाःगु अवस्था दु । थुकथं वनेगु इलय् महामारीया जोखिम म्हो यायेत येँ महानगरं बहन यायेमाःगु सकतां दायित्व पुरा याइ ।’
महानगरया जनस्वास्थ्य विभागया प्रमुख हरि कुँवरं सचेतनाया निंतिं स्वास्थ्य शिविर संचालन यायेगु जानकारी बियादिसें खोपसहित जात्रा संचालनया निंतिं माग जुइगु मास्क, पंजा, स्यानिटाइजर लगायत आवश्यक स्वास्थ्य सुरक्षा सामग्री उपलब्ध याकेगु योजना दु धयादिल ।
इन्द्रजात्रा व्यवस्थापन समितिया अध्यक्ष गौतम शाक्यं थ्व स्वयां न्ह्यःया खोप ज्याझ्वलय् खोप काये त्वःफिउपिं व यँयाः व्यवस्थापनय् खटे मजुसे मगाःपिंत महानगरपाखें खोप बीगु ज्या याःगु तसकं च्वछायेबहजू धयादिल ।
वय्कलं यँयाःबलय् खः सालीगु इलय् मदयेक मगाःगु लाखे, हल्च्व आकाश भैरव, पुलुकिसि लगायत सांस्कृतिक रुपं उपस्थित मजसे मगाःपिंत मास्क, स्यानिटाइजर, फेससिल्ड, पंजा लगायतया स्वास्थ्य सुरक्षाया सामग्री उपलब्ध यानाबीत नं इनाप यानादिल ।
यँयाः येँय् जक हनीगु नखः मखसे थ्व राष्ट्रियस्तरया हे नखः खःसा थौंया इलय् थुकिया पहिचान अन्तर्राष्ट्रियस्तरय् नं उतिकं जुयाच्वगु दु । थगुने कोरोना संक्रमणया कारणं रोके जूगु यँयाःया निंतिं थुगुसी यःसिं हयेगु ज्या जुइधुंकूगु दुसा आः वइगु यंलाथ्व द्वादशि शनिवाःकुन्हु सुथसिया ६ः५१या साइतय् यःसिं थनी । यःसिं थनेवं यँयाः विधिवत रुपं शुरु जूगु माने याइ ।
थ्व हे झ्वलय् थुगुसी यःसिं थनीगु इलय् सर्वसाधारणयात उपस्थित याके मबीगु नापं खः सालीगु इलय् नं बसन्तपू लाय्कू जःखः च्वनाः सर्वसाधारणं जात्रा अवलोकन याये मखनीगु जूगु दु । बसन्तपुलिइ दशअवतार देगः व माजु देगः दयेकेगु ज्या जुयाच्वंगु व मेखे कोरोनाया जोखिम ल्यना हे च्वंगुलिं सर्वसाधारणं उगु थासय् मुनाः जात्रा स्वये खनीगु अवस्था मदु ।
व्यवस्थापन समितिं जात्राया इलय् वसन्तपुलिइ यक्व मनू ममुनेत इनाप यासें आम संचारमाध्यमपाखें जात्रा अवलोकन यायेत इनाप याःगु दु । अथे हे खः सालीगु स्थानीयत रथय् वयाः पुजा बीगु पलेसा छेँया झ्याः लुखा, बार्दलिइ च्वनाः पुजा बीत व दर्शन यायेत नं इनाप याःगु दु ।
LEAVE YOUR COMMENTS