नेपाःया न्हापांम्ह नृत्य प्राध्यापक श्रेष्ठयात हनीगुयल
नृत्य निर्देशक संघ, नेपालं नेपाःया हे न्हापांम्ह नृत्य प्राध्यापकलिसें नृत्य निर्देशक हनी श्रेष्ठयात हनीगु जूगु दु । थ्व हे वइगु विहीवाः थनया राष्ट्रिय नाचघरय् ‘नृत्य गुरुआमा हनी श्रेष्ठ सम्मान साँझ–२०७४’या नामं छगू सांस्कृतिक ज्याझ्वः यासं नृत्य निर्देशक श्रेष्ठयात हनेत्यंगु खः । संघं छगू पत्रकार सम्मेलन यासें बिउगु जानकारी कथं उकुन्हु वय्कःयात सिजःया हनापौ लिसें ‘डी–डान’ पदक व २५,५५५÷– तका दांलिसें हनेत्यंगु खः । २०१५ सालय् विद्यार्थी जीवनय् हे नृत्यया शुरुवात यानादीम्ह वय्कः थौंया इलय् तकं थ्व ख्यलय् निरन्तर रुपं क्रियाशील जुयाच्वनादीगु योगदानयात कदर यासें हनेत्यनागु संघया नायः भुवन श्रेष्ठं पत्रकार सम्मेलनय् जानकारी बियादीगु दु । थः जक नृत्य ख्यलय् क्रियाशील जुयाच्वनादीगु मखसे न्हूपिंत स्यनेगु नापं नृत्य सम्बन्धी आपालं पाठ््यपुस्तक च्वयेगु नापं थ्व ख्यःयात निरन्तर रुपं बिया वयाच्वनादीगु योगदानया कदर यासें हनेत्यनागु नायः श्रेष्ठं धयादिल ।
संघं थ्व स्वयां न्ह्यः नेपाःया हे न्हापांम्ह नृत्य गुरुकथं कयातःम्ह भैरवबहादुर थापाया सम्मान याःगु खःसा अन्तर्राष्ट्रिय नृत्य दिवसया लसताय् लाकाः न्याम्ह नृत्य गुरुपिंत नं सम्मान याये धुंकूगु दु ।थ्व हे झ्वलय् राज्यं कलाकारयात देय्या तिसा धायेगु यानाच्वंगु तर व्यवहारय् उकथं जुया मच्वंगु धासें कलाकारिता ख्यःयात देय्या न्यागूगु अंगया रुपय् मान्यता बीत व संघ गठन जूगु साउन २६ या दिंयात राष्ट्रिय नृत्य दिवसया रुपय् हनेत नं माग याःगु दु । संघं आः याकनं हे नेपाःया थीथी आदिवासी जनजाति म्हसीका व संस्कृति पिब्वइगु लोक हुलाप्याखं नापं पाश्चात्य, शास्त्रीय, चचा, लोकनृत्य, कत्थक भरतनाट्यम, संकिपाया हुलाप्याखं बेली लगायतया सांस्कृतिक ज्याझ्वः यायेगु नं जानकारी बिउगु दु ।
LEAVE YOUR COMMENTS