पहिचानय् आधारित संघीय गठबन्धनया नेतातय् दथुइ सहलह

येँ – नेपाः राष्ट्रिय पार्टी व थीथी आदिवासी जनजाति पार्टी दथुइ छगू सहलह मुँज्या जुल । नेपाः पार्टीया ज्याकू कालिमातिइ जूगु सहलह मुँज्याय् पहिचानय् आधारित संघीय गठबन्धनया नेतातय् दथुइ वर्तमान राजनीतिक परिस्थितियात कयाः विशेष रुपं वृहत सहलह जूगु खः । नेपाः पार्टीया नायः डा. विजयप्रकाश सैंजूया सभापतित्वय् जूगु सहलह मुँज्याय् पहिचान विरोधीतय् पार्टीया आलोचना यायेगु नापं वर्तमान राजनीतिक परिस्थितिइ पहिचानवादी जनजातितय् पार्टीतय्सं आः गुकथंया भूमिका म्हिताः न्ह्याः वनेमाली धइगु खँय् केन्द्रीत जुयाः सहलह जूगु खः ।

उगु मुँज्यां आः पहिचानवादीत सकलें गुकथं छप्पँछधी जुयाः वने माली धइगु बारे नं दुग्यंक सहलह याःगु खः । लिसें आःया परिस्थितिइ पहिचान विरोधी शक्ति हावी जुया वयाच्वंगु इलय् प्रादेशिक पार्टीतय् भूमिका अझ सशक्त व महत्वपूर्ण जुइगु निष्कर्ष पिकासे माल धाःसा लिपा वनाः दक्षिण अफ्रिकाया अफ्रिकी नेशनल कंग्रेस (एएनसीं) थें सकल जनजाति पार्टी नापं जानाः न्ह्याः वनेगु खँय् नं विस्तृत रुपं सहलह जूगु खः ।

थ्व हे झ्वलय् उगु मुँज्यां दक्वं पहिचानवादी जनजातितय् पार्टी एएनसीया मोडेलकथं वनेत निर्वाचन आयोगया व्यवस्था छु दु धइगु बारे न्यनेकने यायेत निर्वाचन आयोगय् छगू डेलिगेशन वनेगु निर्णय जूगु नेपाःपार्टीया नायः सैंजूं कनादीगु दु । वय्कलं बियादीगु जानकारी कथं आः वइगु आइतवाः हे थ्व सम्बन्धय् न्यनेकने यायेत दक्वं जनजाति पार्टीया नेतात आयोगय् छगू डेलिगशन वनीगु जुयाच्वंगु दु ।

उगु सहलह मुँज्याय् नेपाः पार्टीया प्रवक्ता अनिल सुवाल, सहसचिव विष्णु गोपाली नापं लिम्बुवान पार्टीया नायः कुमार लिङदेन मिराक व उपाध्यक्ष विश्वेन्द्र चेम्जोंग, थरुहट पार्टीया नायः भानुराम थारु, ताम्सालिङ पार्टीया नापं सिंगमान तामाङ, उपाध्यक्ष रामबहादुर घिसिङ, आदिवासी जनजाति पार्टीया नायः बुद्धराज स्याङताङ लगायतया नेतातय् उपस्थिति दुगु खः ।