मैदाय् भ्याट लागू याःगुया विरोध

येँ – न्हिथं मदयेकं मगाःगु छुचुंलय् चालु आर्थिक दँ निसें मूल्य अभिवृद्धि कर लगे याःगुलिं छुचुंया भाः थहां वनाः देशय् दुगु सुइच्यागू उद्योग जोखिमय् लाःगु खँ धाःगु दु । नेपाल मैदा उद्योग संघं म्हिगः छगू प्रेस विज्ञप्ति जारी यासें थ्व खँ धाःगु खः । भारतं वैध व अवैध रुपं वइगु छुचुं लिसे प्रतिस्पर्धा याये मफइगु धासें संघं स्वदेशय् आत्मनिर्भर जुइधुंकूगु छुचुनय् करया भार अप्वयेकेवं उद्योगयात थप समस्या लाइगु खँ न्ह्यथनातःगु दु ।

छुचुनय् मृल्य अभिवृद्धि कर लगे जुल धाःसा प्रति किलो छुचुया भाः न्यातका निसें खुतका तक अप्वयेफइगु

उद्योगया अध्यक्ष माधव लाल श्रेष्ठं पिथंगु वक्तव्यय् सरकारं देशय् खाद्यान्न आत्मर्निभर जुइगु घोषणा याःसां नं व्यवहारय् मजूगु धासें स्वदेशी उद्योगं आः थप फयेमालीगु जुयाः छुचुं उद्योग निरुत्साहित जूगु खँ न्ह्यथनातःगु दु । विज्ञप्तिइ करया कारणं करोडौंया लगानी यानाः उद्योग चायेकाः जोखिम कायेगु पलेसा ट्रेड व्यापार यायेत हे प्रोत्साहित जुइगु धासें कन्हय् वनाः नेपाः कृषि वस्तु आयात याइगु देश जुइगु निश्चित दु धयातःगु दु ।

सर्वसाधारण जनतां छ्यलाच्वंगु खाद्य वस्तुइ मूल्य अभिवृद्धि कर लगे जूगु व थ्व करया भार उद्यमीयात जक मखसे उपभोक्तायात नं लाइगु धासें इलय् हे थुकिया बारे निर्णय यायेत नंं संघं सरकारयात इनाप यानातःगु दु । छुचुनय् मृल्य अभिवृद्धि कर लगे जुल धाःसा प्रति किलो छुचुया भाः न्यातका निसें खुतका तक अप्वयेफइगु खँ धाःगु दु ।

 

सम्बन्धित बुखँ

LEAVE YOUR COMMENTS