ने. सं. ११४६ बछलागा तृतीया -

उद्यमी ढकालयात बैंकिङ कसुरया मुद्दा लाइगु

येँ – नेपाल उद्योग वाणिज्य महासंघया पुलांम्ह अध्यक्ष चण्डीराज ढकालयात वाणिज्य बैंकं कयातःगु त्यासा वइगु असार दुने मपुल धाःसा बैंकिङ्ग कसुर अन्तर्गत मुद्दा तइगु जूगु दु । ढकालपाखें असार तकया दुने त्यासा म्हयेगु निंतिं अर्थ मन्त्रालयं हे वाणिज्य बैंकयात धायेधुंकूगु व त्यासा मपुल धाःसा कारवाही न्ह्याकेत लँ चायेकेधुंकूगु खँ धाःगु दु ।

उद्यमी ढकालं थःगु मोमेन्टो एपेरेल्स कम्पनीया नामं वाणिज्य बैंकपाखें २०६४ सालं निसें कया वयाच्वंगु ३० करोड दां त्यासा कयातःगु खः । ब्याज तकं मपूगुलिं साँवा, ब्याज व जरिवाना यानाः थ्व त्यासा आः डेढ अर्बतका थ्यंवनेधुंकूगु दु । ढकालं नियतवश हे बैंकया ध्यबा मपू जूगुलिं वइगु असार तकया दुने नं ‘सेटल’ मयात धाःसा बैंकिङ्ग कसुरय् लाकेगु तयारी वाणिज्य बैंकं याःगु खः ।

वाणिज्य बैंकं २०६७ सालय् हे ढकालयात कर्जा सुचना केन्द्रया हाकुगु धलखय् लाकेधुंकूगु खः ।बैंकया प्रमुख कार्यकारी अधिकृत किरणकृष्ण श्रेष्ठं ढकालपाखें त्यासा म्हयेगु निंतिं आवश्यक प्रक्रिया सुरु जुइधुंकूगु खँ धाःगु दु । सिइओ श्रेष्ठं ढकाल त्यासा पुलेगु निंतिं नेगोसिएसनय् वयाच्वंगु व असार मसान्त तकया दुने निष्कर्शय् वइगु खँ धयादीगु दु ।

वय्कःया कथं असार मसान्त तकया दुने ढकालं पूवंक हे त्यासा पुल धाःसा बैंकं तःधंगु छुट बीगु जूगु दु । तर त्यासायात पुनर्संरचना याइगु जुल धाःसा छुं नं छुट मदइगु खँ धाःगु दु ।स्रोत कथं बैंकं ढकालयात त्यासा पुलेगु खःसा ब्याज व जरिवानाय् छुट यानाः ४८ करोड जक पूसां गाः धायेधुंकूगु दु । तर ढकालं धाःसा पूवंक हे ब्याज व जरिवाना छुट यायेमाःगु व थःम्हं ३८ करोड जक पुलेफु धयाच्वंगु खँ सीदुगु दु ।

तर वाणिज्य बैंकं धाःसा ४८ करोडं म्हो यायेमफइगु, यदि असार दुने मपुल धाःसा कानुनी कारवाहीलय् वनेगु खँ धयाच्वंगु दु । ०६४ सालय् त्यासा काबलय् ढकालं थःगु कम्पनीया नामय् दुगु स्वंगू विघा जमिन व कम्पनीया मेसिनत बरः तःगु खः । आः थुपिं मेसिनत ज्यालगे हे मजुइधुंकूगु व धितो तयातःगु जग्गां नं त्यासाया ध्यबा पुलेत मगाइगु अवस्था वःगु दु ।

थज्याःगु अवस्थाय् ढकालं त्यासाया दुरुपयोग याःगु ठहर जुइगु जूगुलिं बैंकिंगु कसुर अन्तर्गत कारवाही न्ह्याकेफइगु खँ धाःगु दु ।वाणिज्य बैंकं त्यासाया मामिला तच्वः यानाच्वनेगु स्वयां उकियात सल्टे यानाः वन धाःसा बैंकया नं आम्दानी जुइगु व उकिया निंतिं छ्यलातःगु जनशक्ति नं मेथाय् छ्यलेफइगु जूगुलिं ढकालयात छुट सहित ध्यबा पुइकेगु कुतः यानाच्वंगु खः ।

तर ढकालं धाःसा शक्तिकेन्द्र दुगु थःगु पहुँचया आधारय् अझं छुट कायेत स्वयाच्वंगु खँ सीदुगु दु । छुटया निंतिं नेपाल उद्योग वाणिज्य महासंघया पदाधिकारीतय्त नं छ्यलाः दबाब बीकेगु यानाच्वंगु खँ बैंक स्रोतं धाःगु दु । न्हापां निसें शक्तिकेन्द्रया दबाबं हे ढकालं नियतबश ध्यबा मपुसे च्वनाच्वंगु जूसां थ्व पालय् अर्थ मन्त्रालयं हे पहल यानाहःगुलिं ढकालयात ध्यबा पुलेत दबाब लानाच्वंगु खँ धाःगु दु ।