हलिं नेवाः दबू स्वक्वःगु तःमुँज्या–११३९ घोषणापौ
तःजिगु नेवाः संस्कृतिया प्रतिनिधित्व यासें हलिमय्न्यंकं बसोबास यानावयाच्वंपिं नेवाःतय्गु मंकाः तःमँुज्याकथं नेपाःया येँय् हलिं नेवाः दबूया मू ग्वसाः व हलिं नेवाः दबू नेपाः देय् मू कवःया ग्वसालय् हलिंया थीथी देसं झाःपिं अथेहे प्यसः प्रतिनिधितय्गु सक्रिय सहभागिताय् ने.सं. ११३९ चिल्लागा ८ निसें १० तक (विसं २०७५ चैत १४ निसें १६ तक÷सन् २०१९ मार्च २८ निसें ३० तक) तःजिक जूगु ‘हलिं नेवाः दबू’या स्वक्वःगु तःमुँज्या नेवाः म्हसीका आन्दोलनय् बिस्कं महत्व दुगु ऐतिहासिक ज्याझ्वः जूगु दु । सम्मेलनय् जूगु तःजिगु सहलहया लिधंसाय् क्वय् च्वयाकथंया घोषणापत्र तःमुँज्याया निष्कर्षकथं जारी यायेगु सहमति जूगु जुल ।
१. नेपालं पिने व नेपालय् दुने च्वनाच्वंपिं नेवाःतय्सं थःगु म्हसीका व सभ्यता हलिमय् ल्यंकातयेत छधीछप्पँ जुइगु कुतः यायेगु जुइ ।
२. छुं नं अवस्थाय् नेवाःतय्त लिउने लाकीगु असमान व्यवहारया विरोधय् हलिं नेवाः दबुलिं न्ह्याबलें सशक्त सः थ्वयेका च्वनी ।
३. नेवाः सभ्यता व सम्पदा न्हंकीगु छुं नं ज्याझ्वः पनेत हलिं नेवाः दबू न्ह्याबलें सक्रिय व सजग जुयाच्वनी ।
४. नेपालभाषाया संरक्षण व थपूया निंतिं हलिं नेवाः दबुलिं देसं दुने वा पिने सक्रिय जुयाच्वंपिं संस्था वा पुचःनाप सहकार्य याइ ।
५. विकास व आधुनिकताया नामय् नेवाः बस्ती व वासिन्दातय्त विस्थापित यायेगुयानापं नेपाःया मूर्त अमूर्त सम्पदा विनाश यायेगु षडयन्त्र थौं नं जुयाच्वंगुलिं अज्याःगु षडयन्त्रकारी अतिक्रमण व दमनया तच्वकं भत्र्सना यासेँ अज्याःगु विभेदपूर्ण, असामाजिक, प्रतिगमनकारी, जनविरोधी ज्यात तुरुन्त दिकेया निंतिं सरकार, जिम्मेवार निकाय व अन्तर्राष्ट्रिय समुदायया न्ह्यःने हलिं नेवाः दबुलिं दबावमूलक ज्याझ्वःत सशक्तकथं न्ह्याकाच्वनी ।
६. हलिं नेवाः दबुलिं न्हापा घोषणा याःकथं नेपाःया संविधानया धारा ७ य् खय् भाय् छगूयात जक ‘नेपाली’ धयाः ‘सरकारी कामकाजया भाय् जुइ’ धकाः धयातःगु विभेदकारी व्यवस्थाय् छुंकथंया हिउपाः मवःगुलिं थ्व खँपुयात हीकाः नेपाः दुने ल्हाइगु नेपाःया दक्वं भाय्यात ‘नेपाली भाय्’ धायेगुया नापं विना भेदभाव सरकारी ज्याय् छ्यले दइगु अधिकार दयेकेत सशक्त पहल हलिं नेवाः दबुलिं याइ ।
७. नेपालं सन् २००७ य् अनुमोदन यायेधुंकूगु आईएलओ महासन्धि १६९ कथं नेपालय् ऐन कानूनया व्यवस्था यानाः कार्यान्वयन यायेगुया नापं महासन्धिकथंया दक्वं जिम्मेवारी नेपाल सरकारं यायेमाः ।
८. नेवाः कला, संस्कृति, सम्पदा, सभ्यता, भाय्, साहित्य, पत्रकारिताया विकासया निंतिं हलिंन्यंकया मंकाः कुतःकथं नीस्वंगु ‘हलिं नेवाः कोष’ यात हलिं नेवाः दबुलिं विस्तार याना यंकी ।
९. नेवाःतय् हकहित सम्बन्धय् नेवाःतसें थम्हं थःत शासन यायेदइगु स्वशासनया व्यवस्थाया निंतिं हलिं नेवाः दबुलिं निरन्तर सः ततं वनी ।
१०. ताःहाकःगु इतिहास दुगु नेपालभाषाया वाङ्मययात क्रमशः अन्तर्राष्ट्रियकरण यायां यंकेया निंतिं हलिं नेवाः दबुलिं सक्रिय, विशेष व सशक्त पहल यायां वनी ।
११. सम्मेलनय् जूगु सहलहया लिधंसाय् नेवाः समुदायया बहुआयामिक विकासया निंतिं अल्पकालीन, मध्यकालीन व दीर्घकालीन नीति, रणनीति व ज्याझ्वः हलिं नेवाः दबुलिं निर्धारण याइ ।
१२. नेवाः पहिचान व सभ्यतायात धिसिलाक्क न्ह्याकेगु अभियानय् नेवाः ल्याय्म्ह व मिसा पुचःयात समावेशी व सहभागितामूलक धंगं सशक्तीकरण यायेगुया नापनापं न्ह्याकायंकेगु ज्याय् हलिं नेवाः दबू सक्रिय जुइ ।
LEAVE YOUR COMMENTS