सत्यमोहन जोशीयात राष्ट्रिय सम्मान बियाः मृत्यु संस्कार, सीम्ह अध्ययनया निंंतिं अस्पतालय्
येँ (नेपालभाषा टाइम्स)÷वरिष्ठ संस्कृतिविद् लिसें वाङ्मय शताब्दी पुरुष सत्यमोहन जोशीयात ‘राष्ट्रिय सम्मान’ बियाः अन्तिम संस्कार याःगु दु । यलया किष्ट अस्पतालय् वासः याकाच्वनादीम्ह भाजु म्हिगः सुथय् ७ः०७ बजे १०३ दँया वैंशय् मदुगु खः ।
वय्कःया सीम्हयात अन्तिम श्रद्धाञ्जलि प्वंकेत म्हिगः यल महानगरपालिकायाया ज्याकुथिइ तयातःगु खः । अन वय्कःयात प्रधानमन्त्री शेर बहादुर देउवालिसें पुलांम्ह प्रधानमन्त्री लिसें माओवादीया अध्यक्ष पुष्पकमल दाहाल, सभामुख अग्नि सापकोटा, मन्त्रीपिं, कलाकार, साहित्यकार लिसें भाषा आन्दोलनया न्ह्यलुवापिं दुर्गालाल श्रेष्ठ, मल्ल के. सुन्दरपिंसं नं अन्तिम श्रद्धाञ्जलि प्वंकादीगु खः ।
अन्तिम श्रद्धाञ्जलि प्वंकेधुंकाः वय्कःया सीम्ह उइगु ज्या धाःसा मजू । मदुम्ह जोशीं थः मदयेधुंकाः थःगु सीम्ह चिकित्सकीय अध्ययनया ज्या यायेगु लागिं दान यायेगु धकाः न्हापा हे घोषणा यानादीगु जूगुलिं छेँजःपाखें यायेमाःगु परम्परागत मृत्यु संस्कार लिपा वय्कःया सीम्हयात किष्ट अस्पतालयात तं लित बिउगु खः । भाजु जोशीया उपचार वंगु स्ववाः न्ह्यवंनिसें किष्ट अस्पतालय् हे जुयाच्वंगु खः ।
वय्कःयात अन्तिम श्रद्धाञ्जलि प्वंकेगु झ्वलय् म्हिगः प्रधानमन्त्री शेरबहादुर देउवां वय्कःया सीम्हय् राष्ट्रिय ध्वाँय् फायेकादीगु खः । वय्कः मदुगु शोकय् म्हिगः यल महानगरपालिकाय् विदा घोषणा जूगु खः ।
वय्कः मदुगु दुःखय् थीथी संघ संस्था व व्यक्तिपिंसं शोक सन्देश बिया हःगु खः । थ्व झ्वलय् राष्ट्रपति विद्यादेवी भण्डारीं नं छगू सन्देश जारी यासें संस्कृतिविद् जोशी मदुगुलिं देशं अभिभावक तंकेमाःगु खँ धयादीगु दु । राष्ट्रपति भण्डारीं धयादीगु दु, ‘वय्कःया सार्थक जीवन झी सकसियां नितिं प्रेरणाया अजस्र स्रोत खः, अमर सत्यमोहन प्रति हार्दिक श्रद्धाञ्जली ।’
भाजु जोशीया सीम्हयात अस्पतालय् यंकेधुंकाः आः उकी थीथी कथंया रसायन तयाः सुरक्षित याइगु व उकिया अध्ययन याइगु खँ धाःगु दु । अध्ययन यायेत थुलि हे ई काइ धाये फइ मखु । अध्ययन लिपा उकियात गोप्य रुपं थःगु हे कथं अन्तिम संस्कार याइगु खँ धाःगु दु ।
LEAVE YOUR COMMENTS