किपू नगरपालिकाया जनप्रतिनिधिपाखें मंकाः राजीनामा

येँ(नेपालभाषा टाइम्स)- आः जुइगु स्थानीय तहया चुनावय् उम्मेदवार जुइपिं बहालवाला जनप्रतिनिधितय्सं मनोनयन दर्ता याये न्ह्यः राजीनामा बीमाः धइगु प्रावधान तयातःसां अज्याःगु राजीनामा सुयात बुझे यायेगु धइगु स्पष्ट मजूगु खँ सीदुगु दु ।

निर्वाचन आयोगं उम्मेदवारी बीपिंसं राजीनामा बीमाः धाःसां पालिकाया प्रमुख उपप्रमुखपिंसं सुयात राजीनामा बीगु धयागु हे समस्या जुयाच्वंगु दु । संविधानय् पालिकाया प्रमुखं राजीनामा बीमाःसा उपप्रमुखयात बीगु व उपप्रमुखं राजीनामा बीगु खःसा प्रमुखयात बीमाः धकाः उल्लेख यानातःगु दु । तर निम्हेसिनं राजीनामा बीगु जुल धाःसा सुयात बीगु धयागु उल्लेख मदुगुलिं राजीनामा सुयात बीगु धयागु खँय् अन्यौल जुयाच्वंगु खः ।

तर राजीनामा बीगु खँय् अन्यौल ब्वलनाच्वंगु दुसां किपू नगरपालिकाया मेयर उपमेयर लिसें झिगुलिं वडाया वडाध्यक्षपिंसं धाःसा म्हिगः मंकाः राजीनामा बिउगु दु । स्थानीय चुनावय् उम्मेदवारी बीपिंसं राजीनामा बीमाः धकाः सर्वोच्चया फैसला वयेवं राजीनामा बिउपिं किपूया जनप्रतिनिधिपिं दकलय् न्हापांपिं जूगु दु ।

किपू नगरपालिकाया सभाहलय् म्हिगः छगू पत्रकार सम्मेलन यासें किपू नगरपालिकाया जनप्रतिनिधिपिंसं मंकाः राजीनामा बियागु जानकारी बियादीगु खः । पत्रकार सम्मेलनय् न्ववासें किपू नगरपालिकाया प्रमुख रमेश महर्जनं थःपिंसं बिहिवाः हे राजीनामा बियागु खःसां प्राविधिक कारणं शुक्रवाःनिसें राजीनामा लागू जुइगु खँ कनादिल ।

प्रमुख महर्जनं थःपिंसं राजीनामाया निंतिं स्थानीय विकास मन्त्रालयय् सहलह यानागु खःसां प्राविधिक समस्या दनिगु खँ कनादिल । तर किपू नगरपालिकाया सकलें वडाध्यक्ष लिसें छुं छुं वडा सदस्यपिनिगु राजीनामा पौ धाःसा थःपिंसं संकलन यायेधुनागु खँ वय्कलं कनादिल ।
वय्कःपिनिगु राजीनामा पतिइ थःपिं वइगु स्थानीय निर्वाचनय् उम्मेदवारी बीगु मं दुगुलिं थःथःगु पदं राजीनामा बियागु धकाः उल्लेख यानातःगु दु ।

राजीनामा बीत याःगु पत्रकार सम्मेलनय् प्रमुख महर्जन, उपप्रमुख सरस्वती रिजाल खडका लिसें वडाध्यक्षपिनि उपस्थिति दुगु खः । वइगु निर्वाचनय् उम्मेदवारी मबीपिं छुं छुं वडा दुजःतय्सं धाःसा राजीनामा बियामदी ।

निर्वाचन आयोगं वइगु वैशाख ११ व १२ गते मनोनयन दर्ता यायेगु ज्याझ्वः तयातःगु दुसा मनोनयन दर्ता याये न्ह्यः बहालवाला पदाधिकारीं राजीनामा बीमाःगु व्यवस्था यानातःगु दु ।

राजीनामा घोषणा याये न्ह्यः प्रमुख महर्जनं थःपिनिगु कार्यकाल प्यदँ व झिंछला दुने यानागु थीथी ज्याया जानकारी नं बियादीगु खः । किपुली २०७४ जेठ ८ गते जनप्रतिनिधिपिनि पदबहाली जूगु खः ।

पत्रकार सम्मेलनय् न्ववानादिसें उपमेयर सरस्वती खड्का रिजालं थःपिनिगु कार्यकालय् सुं नं जनप्रतिनिधिं छुं नं कथंया भ्रष्टाचार याःगु मदु धासें थःपिनिगु कार्यकाल भ्रष्टाचारमुक्त कथं न्ह्याःगु खँ धयादिल ा

सम्बन्धित बुखँ

LEAVE YOUR COMMENTS