एमालेया २० सांसदया राजीनामा तयार

येँ – न्हूगु सरकार गठनया निंतिं लँपु चायेकेत नेकपा (एमाले) या वरिष्ठ नेता माधव नेपाल–झलनाथ खनाल पुचःया सांसदतय्सं मंकाः राजीनामा बीगु निश्चित याःगु दु । विज्ञ सूत्रं धाःकथं आः नेपाल पक्षया म्होतिं नं नीम्ह सांसदतय्सं मंकाः राजीनामा बीगु निर्णय याना तयेधुंकूगु दु ।

यदि एमालेया नीम्ह सांसदतय्सं राजीनामा बिल धाःसा नेपाली कांग्रेसया नेतृत्वय् सरकार गठन यायेत अःपुइगु जूगुलिं उकथं तयारी जुयाच्वंगु खँ धाःगु दु । यदि एमालेया २० म्ह सांसदतय्सं मंकाः राजीनामा बिल धाःसा जसपाया पूर्व राजपा खेमां भोट मबिउसां नं कांग्रेसया नेतृत्वय् सरकार गठन याये फइगु खँ धाःगु दु ।

थ्वहे झ्वलय् एमालेया सांसद जीवनराम श्रेष्ठं आः गुगु नंं इलय् थःपिनिगु मंकाः राजीनामा वये फइगु खँ धयादीगु दु । वय्कलं धयादिल, ‘आवश्यक जुल धाःसा राजीनामा बीगु निर्णय जुइधुंकूगु दु, गुगु नं इलय् राजीनामा वयेफु ।’

एमालेया सांसदतय्सं राजीनामा बिउगु अवस्थाय् जनता समाजवादी पार्टीया अध्यक्ष महन्थ ठाकुर व वरिष्ठ नेता राजेन्द्र महतो पक्षं मत मबिउसां नं कांग्रेसया नेतृत्वय् सरकार गठन यायेत अःपुइगु जूगुलिं नं आः मंकाः राजीनामाया तयारी जुयाच्वंगु खँ वय्कलं कनादीगु दु । यदि एमाले सांसदतय्सं राजीनामा बियाः सरकार गठन याये माःगु अवस्था वल धाःसा जनता समाजवादी पार्टी नं विभाजन जुइगु निश्चित दुगु खँ धाःगु दु ।