मत मवयाः फोन नापं ठप्प

येँ – नेपाल दूरसञ्चार प्राधिकरणं धाकुफसं प्रभावित क्षेत्रय् तत्काल दूरसञ्चार सेवा उपलब्ध याकेत दूरसञ्चार सेवा प्रदायकयात निर्देशन बिउगु दु । आइतवाः बहनी वःगु धाकुफसं तराईया स्वंगू जिल्लाया न्यासः स्वयां अप्वः मोबाइलया बिटिएस टावरय् क्षति याःगु खः । बिटिएस टावरय् क्षति जूगुलिं स्वंगू जिल्लाय् दूरसञ्चार सेवा अवरुद्ध जुयाच्वंगु दु ।

प्राधिकरणं नेपाल टेलिकम, एनसेल नेपाल लगायतया सेवा प्रदायकयात तत्काल सेवा सञ्चालन जुइगु वातावरण दयेकेत निर्देशन बिउगु खः । नेपाल विद्युत प्राधिकरणया मतया लत्था क्वःदःगुलिं मत आपूर्ति नं ठप्प जूगु दु । मत मवयाः दूरसञ्चारया टावरं ज्या मयाःगुलिं टेलिफोन सेवा सुचारु यायेत थाकुइगु खँ धाःगु दु ।
वंगु आइतवाः बहनी वःगु धाकुफसं बारा व पर्साया ८० प्रतिशत छेँया पौ ब्वयेका यंकूगु खःसा गुलिखे छेँ हे दुना वःगु खः ।

छेँया पौ ब्वयेका यंकेवं भण्डारण यानातःगु अन्न नष्ट जूगु दु । तराई लागाय् आपालं धइथें छेँ सुपौयागु जुयाच्वंगुलिं आपाः क्षति जूगु खँ धाःगु दु । धाकुफसं दकलय् अप्वः बाराया भरवलीयाय् क्षति जूगु दु । धाकुफसं प्रभावित भलुही, पुरैनिया परसौन व बिजवनिया लगायत थासय् प्रभावित जूगु खः । आपालं मनूत घाःपाः जूगुलिं बारा व पर्साया अस्पतालय् हिया अभाव शुरु जूगु दु ।