प्वाथय् दुम्ह पयर्टक सीगुलिं पोचुर्गलया स्वास्थ्यमन्त्री पाखें राजीनामा

एजेन्सी- पोर्चुगलया स्वास्थ्य मन्त्री मार्टा टेमिडों प्वाथय् दुम्ह पर्यटक सीगुलिं राजीनामा बिउगु दु । प्रसुति वार्डया अभावया कारणं छम्ह प्वाथय् दुम्ह भारतीय पर्यटक सीगुलिं स्वास्थ्य मन्त्री टेमिडों राजीनामा बिउगु खः । ३४ दँ दुम्ह उम्ह मिसा प्रसुति वार्डया अभावया कारणं छगू अस्पतालं मेगु अस्पतालय् यंकेगु झ्वलय् कार्डियाक अरेस्ट जुयाः सीगु खः ।

बीबीसीया कथं स्वास्थ्यमन्त्रीं राजीनामा बिउगु कारण धाःसा थ्व हे जक मखु । छुं ई न्ह्यःनिसें आलोचकतय्सं पोर्चुगलय् प्रसुतिसम्बन्धी ज्या याइपिं मनूतय््गु गम्भीर अभाव जुयाच्वंगु द्वपं बियावयाच्वंगु खः ।

राजीनामा बिउम्ह पोर्चुगलया स्वास्थ्यमन्त्री डा. मार्टा टेमिडो सन् २०१८ य् मन्त्री जूगु खः । पोर्चुुगलय् कोरोना महामारीयात नियन्त्रणय् हयेगु श्रेय टेमिडोयात दु । पोर्चुगलया समाचार एजेन्सीतय्कथं पोर्चुगलया प्रधानमन्त्री एन्टोनियो कोस्टां स्वास्थ्यमन्त्रीया राजीनामा स्वीकार यासें वं याःगु बांलाःगु ज्याया निंतिं सुभाय् नं बिउगु दु ।

पोर्चुगलया स्थानीय सञ्चार माध्यमतय्कथं सीम्ह पयर्टकयात दकलय् न्हापां पोर्चुगलया राजधानी लिस्बनया दकलय् तःधंगु अस्पताल सान्ता मारियाया नियोनाटोलोजी इकाईलय् यंकूगु खः, तर अन बेड मदुगुलिं मेगु अस्पतालय् यंकेमाःगु खःसा मेगु अस्पतालय् यंकेगु झ्वलय् उम्ह मिसा सीगु खः ।

समाचार संस्था एएनआईया कथं राजधानी लिस्बनया साओ फ्रान्सिको जेभियर अस्पतालय् मिसाया अपरेशन याना मचा धाःसा बुइकूगु दु । मचा मत्यवं बूगुलिं मचायात आइसीयुलय् तयातःगुु दु । मचा स्वस्थ जूगु नं अस्पतालं धाःगु दु । उम्ह मिसा सीगुयात कयाः अनुसन्धान जुयाच्वंगु दु ।