बिस्काः व्यवस्थित रुपं संचालन यायेत सहलह

ख्वप – न्ह्यःने वयाच्वंगु थनया ऐतिहासिक बिस्काः जात्रायात व्यवस्थित रुपं संचालन यायेगु विषयय् सम्बन्धित सरोकारावाल निकायया प्रतिनिधि दथुइ सहलह जूगु दु । थनया ऐतिहासिक बिस्काः जात्राया मुख्य आकर्षणया रुपय् दयाच्वंगु भैलः खः सालेगु लँपु, यःसिं थनेगु नापं स्थानीय रुपं जुइगु जात्रा संचालनया निंतिं अव्यवस्थित रुपं तयातःगु टेलिफोन, केबुल, विद्युत, इन्टरनेट लगायतया तार व्यवस्थापन याइगु जूगु दु ।

सहलह कथं थ्व हे चैत २५ गतेतकया दुने जात्रा संचालन जुइगु लँपुइ लाःगु सकतां कथंया तार सम्बन्धित निकाय थःपिंसं हे व्यवस्थित यायेगु नापं अनावश्यक तार चिइकेगु सहमति जूगु दु । अथे हे सरोकारवालातय् उगु सहलह मुँज्यां देय्न्यंकं व अन्तर्राष्ट्रिय स्तरय् तकं बिस्काः जात्राया थीथी सकारात्मक पक्षया प्रचार प्रसार यायेगु ल्याखं टेलिभिजन व इन्टरनेट सेवा प्रदायक संस्थां थःगु क्षमताकथं प्रत्यक्ष प्रशारण यानाः जात्राया जानकारी बीगु, जात्रा इलय् शान्तिपूर्ण रुपं न्यायेकेत व क्वचायेकेत स्थानीयवासीयात उत्साहित याइगु कथंया समाचार व सूचना सम्प्रेषण व प्रशारण यायेगु सहमति नं जूगु दु ।

बिस्काःया झ्वलय् जात्रा संचालन जुइगु लँपुइ लाःगु तार व्यवस्थित यायेगु सम्बन्धय् जूगु सहलहया इलय् द्यःखः सालीगु लँपु, जात्रा संचालन जुइगु दक्वं क्षेत्र व यःसिं थनेगु थाय् भ्यलुख्यःस्थित यःसिं ख्यलय् च्वंगु तारया अवस्थाबारे जानकारी कायेगु व उकियात व्यवस्थित यायेगु उद्देश्यं ख्वप नगरपालिकां जनप्रतिनिधि, कर्मचारीलिसें विद्युत प्राधिकरण, नेपाल टेलिकम, केबुल व इन्टरनेट सेवा प्रदायक संस्थाया प्रतिनिधितय् मंकाः पुचलं स्थलगत निरीक्षण यायेगु निर्णय नं याःगु दु ।