कोरोना संक्रमणपाखें नेपालय् न्हापांम्ह सीगु पुष्टि

येँ – कोरोना भाइरसया कारणं नेपालय् छम्ह मनू सीगु पुष्टि जूगु दु । बिहीवाः बहनी धुलिखेल अस्पतालय् भर्ना जुम्ह कोरोना भाइरसपाखें सीगु पुष्टि जूगु खः । नेपालय् कोरोना भाइरसपाखें सीगु थ्व न्हापांगु घटना खः । स्वास्था तथा जनसंख्या मन्त्रालयया सह प्रवक्ता डा. समिरकुमार अधिकारीं विज्ञप्ति पिथना सिन्धुपाल्चोकया २९दँया मिसा कोरोना संक्रमणया कारणं सीगु पुष्टि यानादीगु खः ।

उम्ह मिसा वंगु वैशाख २३ गते शिक्षण अस्पताल महाराजगञ्जय् मचा बुइकावःम्ह खः । २५ गते जक बाह्रबिसेया छेँय् लिहां वःम्ह उम्ह मिसाया स्वास्थ्यय् समस्या जुइवं धुलिखेल अस्पताल हःगु खः । अस्पताल हःबलय् उम्ह मिसाया अवस्था गम्भीर जुइधुंकूगु व सासः ल्हायेत तकं थाकुइधुंकूगु खः । अस्पतालय् भर्ना याःगु छुं लिपा मदुम्ह मिसायात सासः ल्हायेत समस्या दुगु व उच्च ज्वरो खनेदयेवं पीसीआर विधिं कोरोना टेस्ट याना स्वःगु खः । धुलिखेल अस्पताल व येँया राष्ट्रिय जनस्वाथ्य प्रयाेगशालाय् याःगु परीक्षणय् उम्ह मिसाया रिपार्ट पाेजेटिभ वःगु खः ।