ने. सं. ११४६ बछलागा पञ्चमी -

कोरोना भाइरस : विश्वन्यंक ७८म्ह नेपाःमित सित, ५ हजार ५ सय संक्रमित

येँ – कोरोना भाइरस (कोभिड-१९)या कारणं विश्वन्यंक च्वनाच्वंपिं ७८म्ह नेपाःमित सीगु दु ।

शनिवाः तकया दुने विश्वया थीथी देशय् च्वनाच्वंपि ७८म्ह नेपाःमित सीगु व ५ हजार ४ सय ७२म्ह कोरोनापाखें संक्रमित जूगु जानकारी गैरआवासीय नेपाली संघं (एनआरएनए) बिउगु दु । एनआरएनए अन्तर्गतया स्वास्थ्य समितिं मुंकूगु तथ्यांक कथं दकलय् अप्व बेलताय् ५१म्ह नेपाःमित सीगु दु ।

अथेहे अमेरिकाय् १५म्ह, संयुक्त अरब इमिरेट्स्टय् ६म्ह, आयरल्याण्ड, जापान, टर्की, नेदरल्याण्ड, बहराइन, व स्वीडेनय् छम्ह-छम्ह सीगु जानकारी स्वास्थ्य समितिया संयोजक डा. संजिव सापकोटां बियादीगु दु ।

कोरोनापाखें दकलय् अप्व कतयारय् २ हजार ३ सय, अमेरिकाय् १ हजार ५ सय व बेलायतय् १ हजार नेपाःमित संक्रमित जूगु दु । कोरोना संक्रमित जूपिं नेपाःमित मध्ये २ हजार धाःसा संक्रमणपाखें मुक्त जुइधुंकूगु अनुमान समितिं याःगु दु ।