वागदरवार थुने मदइगु फैसला

येँ महानगरपालिकां वागदरवार थुनाः न्हूगु भवन दयेके मदइगु जूगु दु । गोर्खा भुखाय्या कारणं पूर्णरुपं क्षति जूगु उगु दरवार थुनां न्हूगु दयेकेगु येँ मनपाया निर्णययात सर्वोच्च अदालतं बदर याःगुलिं उगु योजना विफल जू वंगु खः । वागदरवार मथुनेत माग यासें अदालतय् लाःगु रिट निवेदनय् वंगु वालय् न्यायाधिशद्वय अनिलकुमार सिन्हा व सपना प्रधानया मंकाः इजलासं उगु आदेश जारी याःगु खः ।

उगु आदेशय् महानगरं भवन दयेकेत बिउगु ठेक्का नं बदर याना बिउगु दु । महानगरलिसे वागदरवारया भोगचलनया जक अधिकार दुगु तर स्वामित्व मदुगु धासें सर्वोच्चं उकथंया फैसला याःगु खः । उगु आदेशय् वागदरवार संरक्षणया निंतिं बाःछिया दुने पुरातत्व विभागया महानिर्देशकया संयोजकत्वय् विज्ञ पुचः दयेकेत परमादेश जारी जूगु खः ।

उगु भवन निर्माण जूगु सछि दँ मथ्यंनिगु तर भुखाय्या कारणं जीर्ण जूगु धासें महानगरं थुनेत स्वःगुलिइ १०० दँ मजूसां नं कलात्मक भवन संरक्षण यायेमाःगु जूगुलिं उगु विषयय् प्रवेश याये हे म्वाःगु परमादेशय् न्ह्यथनातःगु खः । गोखा भुखाय् लिपा वागदरवार थुनेत स्वःगु इलय् विरोध जुइवं येँ मनपां प्रबलीकरण यायेगु निर्णय याःगु खः, तर महानगर प्रमुखय् निर्वाचित जुया वयेधुंकाः विद्यासुन्दर शाक्यं हाकनं वागदरवार थुनेगु निर्णय यानाः ठेक्का प्रक्रिया न्ह्याकादिल ।

वय्कलं थ्व भवन वागदरवार मखसे हरि भवन जूगु तर्क नं न्ह्यःने हयादीगु खः । करिब १८ रोपनी क्षेत्रफलय् निर्माण जूगु हरि भवन स्वतँ जाःगु खः । प्राचीनकाल, मध्यकाल व आधुनिक यानाः स्वंगू कालखण्डया ढाँचाय् उगु भवन निर्माण यायेगु येँ मनपाया योजना दुगु खः ।
थ्व स्वयां न्ह्यव नं ‘सम्पदा बचाऔं’ अभियानया अभियन्तातय्सं उगु दरवार संरक्षण यायेत इनाप याना वयाच्वंगु खः ।

थुनेगु ज्या शुरु जूगु स्वलाया दुने सिधयेकेगु व छगू अर्ब न्यय्गू करोड लागतय् पुनःनिर्माण यायेगु येँ मनपाया योजना दुगु खः । गोर्खा भुखाय् व वयां लिपाया पराकम्पं ज्याकू संचालन याये मफइगु अवस्थाय् थ्यंगु वागदरवारया राजस्व विभाग व सहरी विकास विभाग बाहेक येँ मनपाया मेमेगु विभाग, जिल्ला समन्वय समिति, बबरमहल, राष्ट्रिय सभागृह व लुँहितिइ च्वंगु जेडिए कम्प्लेक्सय् संचालन जुयाच्वंगु दु ।

भीमसेन थापां जुजु गीर्वाणवीर विक्रम शाहपाखें लालमोहर तयाः आपालं जग्गा ल्हातय् लाकूगु व विक्रम संवत् १८६८ पाखे वागदरवार दयेकूगु इतिहासकार दिनेशराज पन्तं धयादी । वय्कलं धयादी, ‘आःया भवन वागदरवारया भवन जक मखु, वागदरवार आपालं जमिनय् दयेकूगु व तःधंगु खः ।

थौंकन्हय्या दरवार हरि शम्शेरं भोगचलन याःगुलिं हरिभवन धाःगु खः तर उगु दरवारयात वागदरवार धाःसां नं छुं फरक जुइमखु ।’वि.सं. १९०१ य् भीमसेन थापाया काय्चा माथवरसिंह प्रधानमन्त्री जुइधुंकाः व स्वयां न्ह्यः सरकारीकरण जूगु दरवार हाकनं माथवरसिंहयात हे लित बिउगु खः ।

उकिया दछि लिपा वि.सं. १९०२ लय् तत्कालीन जुजु राजेन्द्रया योजनाय् माथवरसिंहया हत्या वया हे भिंचा जंगबहादुरपाखें जुइवं दरवारयात हाकनं सरकारीकरण याःगु इतिहासकार पुरुषोत्तम शम्शेर जबराया धापू दु । उपेन्द्रविक्रम शाहलिपा वया काय भूपेन्द्रविक्रमं उगु दरवारयात उपयोग याःगु खः ।

वि.सं. १९९० या भुखाचं अनया संरचना जीर्ण याना बिउगुलिं पुनःनिर्माण यायेगु इलय् भूपेन्द्रविक्रमया तःधिकःम्ह काय मोहनविक्रम पूच्वय् च्वं वंगु खः । वया. लिपा उगु दरवार जुद्ध शम्शेरया म्ह्याय् जिलाजं हरि शम्शेरं भोग चलन याःगुलिं उगु भवनयात हरि भवन धाःगु खः । वि.सं. २००७ लिपा सरकारी स्वामित्वय् दुगु उगु दरवारय् छुं ई अर्थ मन्त्रालय च्वंगु खः । वि.सं. २०६० पुस २८ गते तत्कालीन श्री ५ या सरकारं उगु दरवार येँ मनपायात बिउगुलिं उगु हे दँया चैत २७ गतेनिसें महानगरपालिका अन ल्ह्ययेगु ज्या जूगु खः ।

 

सम्बन्धित बुखँ

LEAVE YOUR COMMENTS