ख्वप नगरया फोहर व्यवस्थापन कार्यदलं प्रतिवेदन लःल्हाःत

ख्वप – ख्वप नगरया फोहर व्यवस्थापन यायेत गठन यानातःगु कार्यदलं थःपिनिगु प्रतिवेदन लःल्हाःगु दु । ख्वप नगरया फोहर बिस्कं कथं व्यवस्थापन यायेगु उद्देश्यं गठन यानातःगु कार्यदलं थःपिनिगु प्रतिवेदन लःल्हाःगु खः । करिब न्हय्ला न्ह्यः गठन याःगु कार्यदलया संयोजक अमितशंकर रंजितं थःपिनिगु प्रतिवेदन ख्वप नगरपालिकाया प्रमुख सुनील प्रजापतियात वंगु सोमवाः लःल्हाःगु खः ।

प्रतिवेदनय् ख्वप नगरया थीथी थासं पिहां वइगु फोहरयात ध्वगीगु व ध्वमगीगु निगू ब्वय् ब्वथलेमाःगु, स्वास्थ्य संस्थापाखें पिहां वइगु जोखिमयुक्त फोहरयात गुकथं व्यवस्थापन यायेगु धइगु बारे विस्तृत योजना दुगु कार्यदलया संयोजक रंजितं जानकारी बियादिल । कार्यदलं फोहरयात वैकल्पिक उर्जाया रुपय् प्रयोग याये फइगु सुझाव नं बिउगु दु ।

कार्यदलं फोहरयात वैकल्पिक
उर्जाया रुपय् प्रयोग याये फइगु सुझाव नं बिउगु दु ।

प्रतिवेदन लःल्हाना कासें नगरप्रमुख प्रजापतिं ख्वप नगरया फोहर व्यवस्थापनया निंतिं अल्पकालीन व दीर्घकालीन सोचया आवश्यकता दुगु खँय् बः बियादिल । वय्कलं ख्वप नगरपालिकापाखें संचालन जुइगु ख्वप अस्पतालया फोहर व्यवस्थापनया निंतिं आवंनिसें हे अध्ययन अनुसनधानयात बः बियागु नं धयादिल ।

लिसें फोहरयात प्रांगारिक साः दयेकेगु मौलिक शैलीया प्रविधिबारे नं अधययन अनुसन्धानय् ध्यान बीःगु आवश्यक जूगु वय्कःया धापू दु ।
उगु इलय् नगरपालिका उपप्रमुख रजनी जोशीं नगरपालिकां ख्वप नगरया सुचुकुचुयात ध्यानय् तयाः बाःछिया छक्वः सुचुकुचु अभियान न्ह्याका वयाच्वनागु जानकारी बियादिल ।

छेँखापतिकं पिहां वइगु फोहरमध्ये ध्वगीगु व ध्वमगीगु फोहरयात छेँखा छेँखाय् हे छुटे यानाः फोहर संकलन यायेगु उद्देश्यं नगरवासीयात बाल्टिन व कम्पोष्ट विन वितरण यानागु जानकारी नं वय्कलं बियदिल ।ख्वपया फोहर व्यवस्थापनया निंतिं न्हूगु प्रविधिया अध्ययन यायेत ख्वप इन्जिनियरिङ कलेज व ख्वप कलेजया वातावरण विज्ञानया विज्ञसहितया कार्यदल गठन याःगु खः ।