होलिकुन्हु गुसः सवारीयात कारवाही

येँ – वंगु होलिपुन्हिकुन्हु ट्राफिक प्रहरीं लाक्वपाक्व धंगं सवारी चले याःपिं ९१८ सवारी चालकयात कारवाही याःगु दु । होलिया इलय् स्वनिगः दुने लाक्वपाक्व सवारी चले याःपिं चालकयात कारवाही याःगु खः । महानगरीय ट्राफिक प्रहरी महाशखायाकथं होलिया इलय् नियम हाचां गायाः सवारी चले याःपिंमध्ये ९०५गः मोटरसाइकल व १३गः कार, भ्यान लगायतया सवारी चालकयात कारवाही याःगु खः ।

महाशाखाया प्रमुख लिसें प्रहरी वरिष्ठ उपरीक्षक वसन्त पन्तं होलिया इलय् मादक पदार्थ सेवन, छगः मोटरसाइकलय् नियम अःखः स्वम्ह प्यम्ह च्वनाः चले याःपिं, तीव्र गतिं सवारी चले याःपिं नापं साइलेन्स र लिकयाः ततःसलं सवारी चले याःपिंत कारवाही यानागु जानकारी बियादीगु दु ।

महाशाखा बिउगु जानकारी कथं मोटरसाइकलय् स्वम्ह च्वनाः चले याःपिं ७६, हेल्मेट मपुँसे मोटरसाइकल चले याःपिं ४३, आवश्यक भ्वँ मदुपिं २५ व मेमेगु सवारी कसुरय् स्वीम्ह चालकयात कारवाही याःगु खः । महाशाखायाकथं कारवाही लाःगु सवारीमध्ये २४३ सवारी यात कारवाही यानाः त्वःता छ्वःगु खःसा मेपिं ६७५ सवारीयात धाःसा महाशाखाय् हयाः तःगु खः ।

होलिया इलय् आपालं अवाञ्छित गतिविधित जुइ फइगु नापं मादक पदार्थ सेवन यानाः सवारी चले याइगु जुयाः दुर्घटना अप्वइगुलिं होलियात दुर्घटनारहित व मर्यादित यायेगु ल्याखं महाशाखां ५०० स्वयां अप्वः थासय् ट्राफिक प्रहरी परिचालन याःगु खः । ट्राफिक प्रहरीं नं सुथसिया ७ ताःइलंनिसें हे चेकजांच शुरु याःगु खः।