देगलय् तयातःगु पसः चीकेत २५ वडाया सुचं
येँ (नेपालभाषा टाइम्स)- येँ महानगरपालिकाया २५ वडा ज्याकुथिं देगः व सम्पदा क्षेत्रय् अवैध रुपं तयातःगु पसः चीकेत २४ घौया अल्टिमेट बिउगु दु । वडा ज्याकुथिं सम्पदा लिसे देगलय् तयातःगु पसः चीकेत म्हिगः छगू सुचं जारी याःगु खः ।
वडा ज्याकुथिं वंघःया सन्तानेश्वर महादेव देगः जःखः तयातःगु गा पसः, भ्याचाः द्यः न्ह्यःने च्वंगु देगलय् तयातःगु चाया भाडाया सामान लिसें मेगु थीथी व्यापार व्यवसाय चीकेत निर्देशन बिउगु खः । उकथं हे असनय् च्वंगु उमाशंकर देगः जःखः तयातःगु दुरु मीगु पसः चीकेत नं निर्देशन बिउगु दु ।
वडां जारी याःगु सुचनय् नीप्यघौया दुने सम्बन्धित पसः थुवाःतय्सं थःपिंसं हे पसः मचिकल धाःसा वडा कार्यालयपाखे थुनेगु खँ नं धयातःगु दु ।
थ्वहे झ्वलय् येँ महानगरपालिकां न्हय्न्हुया दुने मनोरञ्जन कर पुलेत क्यासिनोयात निर्देशन बिउगु दु । आर्थिक दँ २०७५÷७६ निसें महानगरपालिकायात मनोरञ्जन कर मपूसें सञ्चालन यानाच्वंगु न्हय्गू क्यासिनोयात येँ मनपां म्हिगः पौ च्वयाः कर पुलेत निर्देशन बिउगु खः ।
LEAVE YOUR COMMENTS