प्रचण्डया हत्या योजना मदु– विप्लव

‘हत्याया द्वपं प्रतिबन्धया औचित्य पुष्टि यायेगु सरकारी योजना’

येँ – सरकारं नकतिनि जक प्रतिबन्ध तःगु नेकपा विप्लव पुचलं थःपिनिगु पार्टीं तत्काल व्यक्ति हत्या यायेगु छुं कथंया योजना मदयेकागु खँ धाःगु दु । वंगु छुं न्हिं न्ह्यः नेपाल कम्युनिष्ट पार्टीया अध्यक्ष पुष्पकमल दाहालं थःगु हत्या यायेगु योजनां विप्लव पुचलं दयेकूगु धकाः धाःगु खँया खण्डन नं विप्लव पुचलं याःगु दु ।

विप्लव पुचःया छम्ह नां कने चाहे मजूम्ह नेतां सरकारं थःपिंत दमन यायेगु निंतिं हत्याया नाटक याःगु धासें धयादीगु दु, ‘गुुगुं नं दल विशेष व उकिया नेतृत्वयात लक्षित यानाः कारबाही यायेगु छुं हे ज्याझ्वः मदु ।’ थःपिंत तःगु प्रतिबन्धया औचित्य पुष्टि याये मफयेवं सरकारं अराजनीतिक व संविधान अःखः गतिविधि यानाच्वंगु धासें वय्कलं उगु हे गतिविधियात औचित्यपूर्ण दयेकेगु योजना कथं जक प्रचण्डया उगु अभिव्यक्ति वःगु खँ धयादीगु दु ।

वय्कलं तत्काल थःपिनि पार्टीपाखें व्यक्ति हत्याया छुं सोच दयेकूगु मदुनि धासें प्रधानमन्त्री केपी शर्मा ओली व नेकपाया अध्यक्ष पुष्पकमल दाहालया नां डायरीइ च्वयाः सुनां नं हत्या यायेत स्वइमखु धासें प्रतिबन्धया औचित्य पुष्टि यायेगु निंतिं सरकारं हे डायरी तयार याःगु जुइमाः धकाः द्वपं नं बियादिल ।

‘सुयागुं हत्या यायेगु धकाः डायरीइ च्वयाः अज्याःगु डायरी ज्वनाः सुं चाःहिलाच्वनी ला ?’ धयागु न्ह्यसः तसें वय्कलं सरकारं हे थज्याःगु फय्गं खँ हयाः जनतायात ध्वं लायेगु ज्या यानाच्वंगु बिचाः प्वंकादिल । अथेहे वय्कलं दल दुने दुपिं भ्रष्ट दलाल व घुस नइपिंत जनकारबाही यायेगु धाःसा थःपिनिगु नीति दुगु धयादिसें तर भौतिक कारबाही व व्यक्ति हत्याया थःपिंसं कल्पना तकं मयाना धयादिल ।

सरकारं मकवानपुरं स्वनिगः वयाच्वंगु इलय् ज्वंम्ह विप्लव पुचःया प्रवक्ता खड्गबहादुर विश्वकर्र्मापाखें प्रम ओली व अध्यक्ष प्रचण्डया हत्या यायेगु च्वयातःगु डायरी बरामद जूगु खँ धायेगु यानाच्वंगु दु ।

प्रतिबन्ध लिपा झिंन्हय्म्ह हिरासतय्
येँ – सरकारं विप्लव नेतृत्वया नेकपायात प्रतिबन्ध तयेधुंकाः झिंन्हय्म्ह विप्लवया नेता कार्यकर्तायात ज्वने धुंकूगु खँ प्रहरी सूत्रं धाःगु दु । नेपाल प्रहरीया विशेष ब्युरोया थीथी युनिटया ग्वाहालिं उमित ज्वंगु खँ धाःगु दु । ज्वंपिं मध्ये उच्च तहया नेतृत्व नं दुगु खँ धाःगु दु । उच्च तहया नेता जीवन्त धइम्ह मोहन कार्की व उमा भुजेल जूगु खँ प्रहरीं धाःगु दु । कार्की व भुजेल निम्हं पोलिटब्युरो दुजःत खः । ज्वंपिंत महानगरीय प्रहरी परिसर टेकुइ तयातःगु दु ।