विरामी सीवं डाक्टरयात हातपात

येँ – येँया त्रिवि शिक्षण अस्पताल कोभिड आईसीयुइ कार्यरत डा. सविन भण्डारीयात म्हिगः हातपात याःगु दु । कोभिड आईसीलय् वासः याकाच्वंम्ह विरामी सीवं सीम्हेसिया थःथितिपिसं डा. भण्डारीयात हातपात याःगु खँ अस्पतालया काभिड संयोजक डा. सन्तकुमार दासं कनादीगु दु । संयोजक दसाया कथं मिस कम्युनिकेशन जूगुलिं उगु घटना जूगु खँ धयादीगु दु । निमोनियाया कारणं बुटवलं शिक्षण अस्पताल रिफर याम्ह विरामी बुटवलय् पीसीआर जाँच नेगेटिभ वःगु खः । अथेजुयाः विरामीयात अस्पतालं ननकोभिड वार्डय् तयाः वासः याःगु खः । वासः यायेगु झ्वलय् भाइरल इन्फेक्सनया शंका जुइवं इन्फ्लुएन्जाया परीक्षण यायेत टेकुइ च्वंगु जनस्वास्थ्य प्रयोगशालाय् छ्वःगु खः ।

डा. दासं धयादी, ‘बुटवलय् याःगु पीसीआर नेगेटिभ वःगु रिर्पोट स्वयेधुंकाः जिमिसं इन्फ्लुएन्जाया जक शंका यानाः परीक्षण यायेत टेकुइ छ्वयागु खः, टेकुइ याःगु परीक्षणय् नं इन्फ्लुएन्जा रिर्पोट नेगेटिभ वयेवं ल्याबं कोरोनाया शंका यानाः पीसीआर याःगु खः, उगु इलय् पीसीआर पोजिटिभ वःगु जिमित फोनं जानकारी वल ।’ पीसीआर रिपोर्ट पोजेटिभ वयेवं अस्पतालं विरामीयात कोभिड आईसीयुलय् तयाः वासः याःगु खःसा वासः यायेगु झ्वलय् मंगलवाः बिरामी मदुगु खःसा वयां लिपा थःथितिपिसं डा. भण्डारीयात हातपात याःगु खः ।

डा. दासया कथं विरामी मदयेधुंकाः रिपोर्ट कायेगु झ्वलय् इन्फ्लुएन्जाया रिर्पोट जक छ्वयाहःगु खः । उगु हे कारणं सीपिनि छेँजःपिसं कारोना संक्रमण मजूम्ह मनूयात कोभिड आईसीयुलय् तयाः वासः यात धकाः हातपात याःगु खः । थ्वहे झ्वलय् हातपात याःगु द्वपनय् प्रहरीं छम्हेसित ज्वंगु दु । डा. भण्डारीयात हातपात याःगु द्वपनय् प्रहरीं कृष्णप्रसाद गौतमयात ज्वंगु खँ प्रहरीं धाःगु दु ।

 

सम्बन्धित बुखँ

LEAVE YOUR COMMENTS