नेपाःया इतिहासय् न्हापांखुसी दुई तिहाइ बहुमतया सरकार

नेपाःया इतिहासय् हे न्हापांखुसी दुई तिहाइ बहुमतया सरकार वःगु दु । प्रधानमन्त्री केपी ओलीया सरकारयात आइतवाः संसदय् दुथ्याःगु कांग्रेस, नेमकिपा बाहेक मेगु फुक्क हे दलं विश्वासया मत बिउगुलिं वय्कःयात दुई तिहाइ बहुमत प्राप्त जूगु खः । दुई तिहाइ बहुमत प्राप्त जूगु थ्व नेपाःया इतिहासय् हे न्हापांगु सरकार खः ।

संसद्य् दुगु २७४ सिट मध्ये १३८ सिटया जक बहुमत दुसां गाःगु खःसां वय्कःयात २०८ मत प्राप्त जूगु खः । वय्कःया सरकारयात माओवादी केन्द्र लिसें संघीय समाजवादी फोरम, राष्ट्रिय जनता पार्टी, राष्ट्रिय प्रजातन्त्र पार्टीं समेत समर्थत बिउगु खः ।

सदनय् दुथ्याःगु नेपाली कांग्रेसयालिसें नेमकिपा व स्वतन्त्र सांसदसमेत यानाः ६० मत जक विरोधय् कुतुं वंगु खः । राजमो व राप्रपाया मत नं सरकारया समर्थनय् कुतुंवंगु खः । नयाँ शक्तिया अध्यक्ष लिसें सांसद डा. बाबुराम भट्टराई धाःसा मलेसिया वनाच्वंगुलिं सदनय् उपस्थित जुयामदी ।

विश्वासया मत कायेधुंकाः आः संसफो सरकारय् दुहां वनीगु जूगु दुसा संसफोयात छु छु मन्त्रालय् बीगु खँय् सहलह यायेगु खँ धाःगु दु । राजपां धाःसा विश्वसाया मत बिउसां दुई तिहाइ बहुमत प्राप्त जुइधुंकाः सरकारं संविधान संशोधन मयाःतले सरकारय् मवनेगु खँ धाःगु दु ।