एमालेय् वंम्ह भीम रावल जिल्ल

येँ – अन्तिम इलय् वयाः माधव नेपालया साथ त्वःताः नेकपा (एमाले) य् दुहां वःपिं नेतात एमाले अध्यक्ष केपी ओलीया पहः खनाः जिल्ल जूगु दु । लिसें ओलीं पार्टीयात जेठ २ गतेया अवस्थाय् यंकेगु धकाः याःगु १० बुँदे सहमति बांलाक पालना मयाः धकाः कचमच नं शुरु याना हःगु दु ।

ओलीं क्यना हःगु पहःया न्हापांगु शिकार एमालेया ‘उग्र’ नेता भीम रावल जुयादीगु दु । रावलं थःत सुदूर पश्चिम प्रदेशया पार्टी इञ्चार्ज दयेकेमाः धकाः तःगु मागयात अध्यक्ष ओलीं अस्वीकार याःगु दु । अन माओवादीपाखें वःम्ह नेता लेखराज भट्टयात इञ्चार्ज दयेकेवः रावल जिल्ल जूगु खः । न्हापा रावल माधव नेपालया प्यानलय् वनाः ओलीया आलोचना यानाच्वंगु इलय् ओलीं माओवादीपाखें वःम्ह भट्टयात सुदूर पश्चिमया इञ्चार्ज दयेकूगु खः ।

लिपा माधव क्याम्प त्वःताः रावल नं ओली क्याम्पय् वल । ओलीपाखे वयेधुंकाः रावलं थःगु सुदूर पश्चिमया इञ्चार्ज पद लित माल धाःबलय् ओलीं संकटया इलय् साथ बिउम्ह नेताया लिकायेगु पाय्छि जुइ मखु धासें छि नं बरु भट्टयात हे ग्वाहालि यानादिसँ धकाः ‘निर्देशन’ बियादिल । रावलं १० बुँदे सहमति कथं थः हे इञ्चार्ज जुइमाःगु खः धायेवं अध्यक्ष ओलीं १० बुँदे सम्झौता धइगु बुलुहुँ लागू जुइगु खः धासें रावलयात सुम्क तया बिउगु खँ धाःगु दु ।

ओलीया थ्व लिसः लिपा रावल असन्तुष्ट जुयादीगु खँ सीदुगु दु । रावलयात ओलीं अज्याःगु लिसः बिया हःगुलिं माधव क्याम्प त्वःताः एमालेय् दुहां वःपिं ‘स्वंगूगु धार’ या मेपिं नेतात नं झस्के जूगु खँ सीदुगु दु । आः ओलीं थःपिंत लिपा थ्यंकं जिम्मेवारीविहिन याइगु ग्याःचिकु उमिके ब्वलना वःगु खँ नं सूत्रं धाःगु दु ।